' میں اور راہل نئے صدر کے انتخابی عمل کا حصہ نہیں '

کانگریس پارلیمانی پارٹی کی رہنما سونیا گاندھی نے کہا ہے کہ نئے کانگریس صدر کے انتخابی عمل میں وہ اور موجودہ صدر راہل گاندھی شامل نہیں ہوں گے۔

پارٹی کی اعلی ٰ پالیسی ساز اکائی ورکنگ کمیٹی کے دہلی میں پارٹی ہیڈکوارٹر میں چل رہے اجلاس کو درمیان میں چھوڑ کر اپنی رہایش گاہ کی طرف نکلتے ہوئے محترمہ گاندھی نے کہا’’ہم دونوں اس عمل کا حصہ نہیں ہو سکتے ۔ میرا اور راہل گاندھی کا صدر کے انتخابات میں رہنا درست نہیں ہے ، اس لئے ہم لوگ باہر جا رہے ہیں ‘‘۔اس درمیان ورکنگ کمیٹی کے اجلاس میں پانچ کمیٹیوں کی تشکیل دی گئی ہے جو مختلف گفت وشنید کر کے پارٹی کے نئے صدر کے لئے اپنی رائے پیش کریں گی ۔

کانگریس پارٹی کے صدر راہل گاندھی نے عام انتخابات میں شکست کی ذمہ داری لینے کے گذشتہ 25 مئی کو ہونے والی ورکنگ کمیٹی کی میٹنگ میں استعفی دینے کی پیشکش کی تھی۔

ورکنگ کمیٹی نے اس وقت ایک آواز میں ان سے عہدہ پر فائز رہنے کی درخواست کی تھی لیکن وہ استعفی پر بضد رہے اس لیے نئے صدر کے نام پر غور کرنے کے لیے ورکنگ کمیٹی کی یہ اہم میٹنگ طلب کی گئی ہے۔

لوک سبھا انتخابات کے بعد ورکنگ کمیٹی کی یہ تیسری میٹنگ ہے۔