دہلی ہائی کورٹ نے دہلی یونیورسٹی (ڈی یو) کے آخری برس کے گریجوئیشن امتحانات کے پروگرام کی تفصیلات پر حلف نامہ دائر کرنے کی ہدایت جاری کی۔عدالت نے ڈی یو سے کورونا وائرس (کووڈ۔ 19) وبا کے پیش نظر امتحانات کے انعقاد کے سلسلہ میں بھی دریافت کیا۔
عدالت نے جاننا چاہا کہ کیا ڈی یو امتحانات آن لائن یا پھر آف لائن یا پھردونوں ذرائع سے کرائے جانے پر غور کررہاہے۔ ڈی یو کے امتحانات دس جولائی سے مقرر تھے جنہیں اب 15اگست کے بعد تک ملتوی کردیا گیا ہے۔ڈی یو کی طرف سے پیش ہوئے سینئر وکیل سچن دتہ نے عدالت سے کچھ وقت دینے کی درخواست کی کیونکہ ڈی یو کو یونیورسٹی گرانٹس کمیشن (یو جی سی) کی نئی رہنما ہدایات کے مطابق امتحانات منعقد کرنے کا ایک نیا منصوبہ تیار کرنا ہے۔