Delhi Riots Case جمعیۃ کی کوشش سے دہلی فساد معاملے میں چار ملزمین بری

جمعیۃ علماء ہند کی کوشش سے دہلی فساد معاملے میں پھنسے چار ملزمین بری ہو گئے ہیں۔ راشد راجا، شاہ رخ، شعیب عرف چھوٹو اور شاہنواز کو بری کیا گیا ہے، ان پر مختلف دفعات کے ساتھ مقدمات درج تھے۔ ان ملزمین میں سے شاہنواز کو چھوڑ کر باقی تینوں کی طرف سے گزشتہ تین سالوں سے جمعیۃ علماء ہند عدالت میں پیروی کر رہی تھی۔

دہلی:قومی دارالحکومت دہلی میں ہوئے فساد معاملے سے چار ملزمین کو آج کرکرڈوما کورٹ نے بری کر دیا ہے۔ چاروں افراد کے خلاف شمال مشرقی دہلی کے برج پوری روڈ اور بھاگرتی وہار میں ہوئے فساد، لوٹ مار معاملے میں کیس درج کیا گیا تھا۔ راشد راجا، شاہ رخ، شعیب عرف چھوٹو اور شاہنواز کو بری کیا گیا ہے، ان پر کوگل پوری تھانے میں 85/20 کے تحت مختلف دفعات کے ساتھ مقدمات درج تھے۔

اس سلسلے میں عدالت میں دو چشم دید گواہ پیش ہوئے ایک گواہ منحرف ہوگیا، جب کہ دوسرے گواہ نے کسی اور مسئلے میں چشم دید ہونے کا اقرار کیا۔ جس کا مذکورہ معاملے سے کوئی تعلق نہیں ہے۔ عدالت نے ثبوتوں کے فقدان کی بنیاد پر ان کو بری کردیا۔ ان ملزمین میں سے شاہنواز کو چھوڑ کر مذکورہ بالا تینوں کی طرف سے گزشتہ تین سالوں سے جمعیۃ علماء ہند عدالت میں پیروی کر رہی تھی۔

صدر جمعیۃ علماء ہند مولانا محمود اسعد مدنی کی ہدایت پر ایڈوکیٹ سلیم ملک وکیل دفاع ہیں۔ سلیم ملک نے بتایا کہ یہ لوگ جمعیۃ کی کوشش سے پہلے سے ہی ضمانت پر باہر ہیں۔ ان پر دوسری ایف آئی آر کے تحت بھی مقدمات درج ہیں، جس میں بھی وہ ان کے کیل دفاع ہیں۔ جمعیۃ علماء ہند کے قانونی معاملات کمیٹی کے اہم رکن مولانا نیاز احمد فاروقی نے بتایا کہ جمعیۃ علماء ہند دہلی فساد سے متعلق 261 ٹرائل کے مقدمات کی پیروی کررہی ہے، جس میں جمعیۃ کی کوششوں سے بہت سارے لوگ بری ہوئے ہیں۔ جمعیۃ نے ازیں قبل مولانا حکیم الدین قاسمی جنرل سکریٹری جمعیۃ علماء ہند کی نگرانی میں وسیع پیمانے پر ریلیف و باز آبادکاری کا کام بھی کیا ہے۔