ٹرک نے پانچ مزدوروں کو کچل کر ہلاک کیا

گروگرام میں ایک تیز رفتار ٹرک نے راہ چلتے پانچ مزدوروں کوکچل دیا، جس سے پانچوں کی موقع پر ہی موت ہوگئی۔

گروگرام کے کنڈلی نیسور پلوال ایکسپریس وے پر یہ حادثہ پیش آیا۔

ڈی سی پی دیپک سہاہارن نے کہا 'یہ حادثہ ہفتہ کے روز دیر رات پیش آیا، یہ سبھی مزدور سڑک کے کنارے چل رہے تھے کہ اس دوران ایک تیز رفتار ٹرک نے انہیں روند دیا جس میں پانچ کی موت واقع ہوگئی اور کچھ زخمی ہوئے'۔

انہوں نے کہا 'ٹرک سبزی سے لدا ہوا تھا اور ڈرائیور نے ٹرک پر سے قابو کھو دیا جس سے گاڑی آپے سے باہر ہو گئی اور یہ حادثہ پیش آیا'۔

انہوں نے مزید کہا 'ہم نے ٹرک کے ڈرائیور کو گرفتار کر لیا ہے اور اس پر کیس درج کر دیا ہے'۔

وہیں اس حادثے میں کچھ افراد زخمی بھی ہوئے تھے جو ہسپتال میں زیر علاج ہیں اور خطرے سے باہر ہیں۔

کورونا وائرس کے پیش نظر ملک بھر میں لاک ڈاون نافذ ہے اور اس لاک ڈاؤن کا شکار مزدور طبقہ اور غریب افراد ہو رہے ہیں، لاکڈاؤن میں پھنسے یہ افراد اپنے گھروں کی طرف پیدل جا رہے ہیں۔