مسجد فتحپوری کے وقف ملازمین ایک برس سے تنخواہ کے منتظر

دارالحکومت دہلی کی شاہی مسجد فتحپوری کے ملازمین گزشتہ 11 ماہ سے تنخواہ کے بغیر ہی اپنی خدمات انجام دے رہے ہیں جب وہ تنخواہ کے لیے وقف بورڈ کا رخ کرتے ہیں تو انہیں دفتر میں بھی گھسنے سے روک دیا جاتا ہے۔

ای ٹی وی بھارت کے نمائندے نے شاہی مسجد فتح پوری کے ملازمین اور موذن سے بات کی جس میں انہوں نے بتایا کہ تقریباً ایک برس ہونے والا ہے لیکن انہیں تنخواہ نہیں ملی۔

مسجد کے دربان محمد عیسیٰ نے بتایا کہ وہ گزشتہ ایک برس سے بغیر کسی تنخواہ کے اپنی ڈیوٹی انجام دے رہے ہیں کیونکہ انہیں دہلی وقف بورڈ تنخواہ نہیں دے رہا۔

وہیں دوسرے ملازمین کی شکایت ہے کہ دہلی وقف بورڈ کے چیئرمین امانت اللہ خان دیگر ریاستوں میں جا کر معاوضہ کا اعلان کر رہے ہیں لیکن جو وقف ملازمین ہیں ان کی پریشانی وقف بورڈ کو نظر نہیں آتی۔

شاہی مسجد فتحپوری کے دربان نے بتایا کہ گزشتہ کچھ ماہ میں سود پر پیسہ لے کر اپنے گھر کا خرچ اٹھا رہے ہیں۔ اس دوران 50 ہزار سے زائد کا قرض انہیں ابھی بھی ادا کرنا ہے۔ تاہم اگر انہیں تنخواہ نہیں ملتی ہے تو اس سے ان کی پریشانیوں میں اضافہ ہو جائے گا۔