کورونا کے پیش نظر مساجد میں جمع نہ ہوں: شاہی امام

دہلی حکومت کی جانب سے عائد پابندیوں کے پیش نظر فتح پوری مسجد کے شاہی امام ڈاکٹر مفتی مکرم احمد نے عوام سے اپیل کی ہے کہ عید الاضحٰی کی نماز کے لیے مساجد میں جمع نہ ہوں نیز کورونا گائیڈ لائنز پر عمل کرتے ہوئے تہوار منائیں۔

ملک میں کورونا وائرس مریضوں کی تعداد میں فی الحال کمی دیکھنے کو مل رہی ہے لیکن تیسری لہر کی پیشن گوئی اور ریاستی حکومت کی جانب سے عائد پابندیوں کے پیش نظر فتح پوری مسجد کے شاہی امام ڈاکٹر مفتی مکرم احمد نے عوام سے اپیل کی ہے کہ عید الاضحٰی کی نماز کے لیے مساجد میں جمع نہ ہوں اور رہنما ہدایات پر عمل کرتے ہوئے تہوار منائیں۔

مفتی مکرم احمد نے کہا کہ گزشتہ دنوں کورونا وائرس کی دوسری لہر سے متاثر ہونے والے افراد کی تعداد میں غیر معمولی اضافہ دیکھنے کو ملا تھا جس کی وجہ سے اموات کی شرح میں بھی اضافہ ہوا تھا ایسے میں ماہرین کا کہنا ہے کہ تیسری لہر کا خوف برقرار ہے اسی لیے ہمیں اپنی جان کو ہلاکت میں ڈالنے سے بچنا ہے۔

انہوں نے مزید کہا کہ کیونکہ یہ ایک عذر ہے اور شریعت ہمیں اس عذر میں اجازت دیتی ہے کہ ہم مساجد میں جمع نہ ہوں اس لیے میں عوام سے اپیل کرتا ہوں کہ عیدالاضحی کی نماز گھروں میں ہی ادا کریں جیسے عید الفطر کی نماز ادا کی گئی تھی۔

واضح رہے کہ گزشتہ دنوں دہلی میں ہسپتالوں کے باہر مریضوں کی قطاریں لگی ہوئی تھی ان سب کو دیکھتے ہوئے دہلی حکومت کی جانب سے کسی بھی مذہبی تقریب کے لیے اجازت نہیں دی گئی ہے۔