قومی دارالحکومت دہلی سے متصل نوئیڈا میں انتظامیہ ڈرائیو تھرو ویکسینیشن کی بھرپور طریقے سے پبلیسٹی کر رہی ہے تاہم جی آئی پی مال سیکٹر 18 میں اس ڈرائیو مہم کے دوران لوگوں کو بد نظمی اور کم عملہ ہونے کے باعث ویکسینیشن کے لئے گھنٹوں انتظار کرنا پڑ رہا ہے۔
نوئیڈا: ڈرائیو تھرو ویکسینیشن کے دوران بدنظمی، گاڑیوں کی لمبی قطاریں ہیلتھ ورکرز کی کمی اور سرور ڈاؤن جیسے سسٹم کی خامیوں نے لوگوں کو گھنٹوں لائن میں پسینہ بہانے پر مجبور کردیا۔ صرف یہی نہیں طویل انتظار کے بعد کار میں بیٹھے لوگوں نے دیکھا کہ پیدل آرہے لوگوں کو ویکسینیشن میں ترجیح دی جارہی ہے۔
بتایا جاتا ہے کہ گوتم بودھ نگر ایڈمنسٹریشن نے ڈرائیو تھرو ویکسینیشن شروع کر کے نظام کو بہتر انداز میں دکھانے کی کوشش کی لیکن یہ پورا نظام کس طرح ایک مناسب طریقے سے کام کرے گا، اس میں کوئی ہم آہنگی نہیں ہو سکی۔ اس کی وجہ سے لوگوں کو گھنٹوں پریشانی کا سامنا کرنا پڑ رہا ہے۔
جی آئی پی مال کا گیٹ نمبر 11 واحد جگہ ہے، جہاں کو ویکسین کی دوسری خوراک رجسٹریشن کے بغیر دی جارہی ہے۔ ایسی صورتحال میں صبح آٹھ بجے سے یہاں بھیڑ جمع ہونا شروع ہو گئی۔ ویکسینیشن صرف کار والوں کا ہوگا یا پیدل آنے والوں کا بھی، اس حوالے سے کوئی واضح پالیسی موجود نہیں تھی۔ ایک کلو میٹر سے زیادہ دور تک کار کی قطاریں لگ گئیں۔ لوگوں کا کئی گھنٹوں بعد نمبر آرہا ہے۔
وہیں چھ گھنٹے لائن میں کھڑے لوگوں کا غصہ موقع پر موجود ہیلتھ ورکرز اور پولیس اہلکاروں پر اترا۔ ویکسینیشن کے عمل میں مصروف عملہ سرور سست اور وسائل محدود ہونے کی بات کر کے لوگوں سے پر سکون رہنے کی بات کرتا رہا۔
