دہلی پولیس نے جہانگیر پوری کے متعدد بلاکس میں کورونا وبا کے چلتے نافذ پروٹوکول کی خلاف ورزی کرنے کی پاداش میں دکانداروں اور مقامی افراد پر جرمانے عائد کئے۔ یہاں لوگ سماجی فاصلہ کی کھلی خلاف ورزی کررہے تھے۔
کورونا وبا کو پھیلنے سے روکنے کے لیے نافذ لاک ڈاؤن کے ابتدائی دنوں میں جہانگیر پورہ علاقہ میں ہی سب سے زیادہ کیسز درج کئے گئے تھے جس کے بعد متعدد بلاکس کو سیل کردیا گیا تھا۔
اب یہاں حالات بہتر ہونے کے بعد تمام بلاکس سے تحدیدات کو ہٹا دیا گیا لیکن دہلی پولیس لوگوں کو محفوظ رہنے کا مشورہ دے رہی ہے۔ جہانگیر پوری کے جے اور آئی بلاک مارکیٹ میں پولیس کاروائی کے دوران لوگوں کو کور ونا وبا سے محفوظ رہنے کی تلقین کی گئی اور ماسک کا استعمال نہ کرنے والوں اور سماجی فاصلہ برقرار نہ رکھنے والوں کے خلاف جرمانے بھی عائد کئے گئے۔
دہلی پولیس دکانداروں کو بھی وارننگ دے رہی کہ آئندہ تمام اصول و ضوابط پر عمل آوری کو یقینی بنائیں۔ پولیس کا کہنا ہے کہ خریداری کے دوران سماجی فاصلہ برقرار رکھنا چاہئے اور ماسک کا استعمال کرنا چاہئے اور جو شخص بغیر ماسک کے خریداری کےلیے آئے اسے دکاندار سامان دینے سے منع کردے۔
پولیس کاروائی کے دوران مقامی لوگوں پر بھی جرمانے عائد کئے گئے جبکہ وہ بغیر ماسک لگائے سڑکوں پر گھوم رہے تھے۔ وہیں مقامی لوگوں نے پولیس کاروائی کی سراہنا کی ہے۔