'مرکز نے نہیں دیا تو دہلی حکومت فراہم کرے گی مفت ویکسین'

دارالحکومت دہلی کے وزیر اعلی اروند کیجریوال نے دہلی کے لوگوں کو مفت کورونا ویکسین دینے کا اعلان کیا ہے۔

کیجریوال نے کہا کہ اگر مرکزی حکومت نے مفت ویکسین نہیں دی تو دہلی کے عوام کو ریاستی حکومت کی جانب سے مفت ویکسین فراہم کی جائےگی۔

انہوں نے مرکزی حکومت سے اپیل کی ہے کہ ہمارا ملک بہت غریب ہے اور یہ وبا 100 برسوں میں پہلی بار آئی ہے۔ ہو سکتا ہے کہ بہت سے لوگ اس کا خرچ نہ برداشت کر پائیں۔ ایسے میں ملک بھر میں یہ ویکسین مفت فراہم کرائی جائے۔

کیجریوال نے کہا کہ اب دیکھنا ہے کہ اس پر مرکزی حکومت کیا فیصلہ لیتی ہے۔ مرکزی حکومت نے اگر ویکسین مفت نہیں دیا تو ضرورت پڑنے پر دہلی کے لوگوں کے لیے ریاستی حکومت کی جانب سے مفت ویسین دستیاب کرائی جائے گی۔

واضح رہے کہ بھارت میں کورونا کی ویکسین کو منظوری دے دی گئی ہے۔ 16 جنوری کو طبی عملے کو کووڈ 19 ویکسین دی جائےگی۔