نئی دہلی: مرکزی وزیر دفاع راج ناتھ سنگھ آج اٹلی اور فرانس کے چار روزہ دورے پر روانہ ہوں گے۔ دورے کے پہلے مرحلے میں مرکزی وزیر دفاع روم میں اطالوی وزیر دفاع گیڈو کریسیٹو سے ملاقات کریں گے۔ گزشتہ مارچ میں اطالوی وزیر اعظم کے دورہ ہند کے دوران دونوں ممالک کے تعلقات کو اسٹریٹجک شراکت داری کی شکل دی گئی تھی۔
دوسرے اور آخری مرحلے میں راجناتھ سنگھ پیرس میں اپنے ہم منصب سیبسٹین لیکورنو کے ساتھ 5ویں سالانہ دفاعی مذاکرات کریں گے۔ ہندوستان اور فرانس نے حال ہی میں اسٹریٹجک شراکت داری کے 25 سال مکمل کیے ہیں۔ دونوں ممالک کے درمیان گہرے اور وسیع دوطرفہ دفاعی تعلقات ہیں جن میں اہم صنعتی تعاون بھی شامل ہے۔
روم اور پیرس دونوں میں وزیر دفاع صنعتی تعاون کے ممکنہ مواقع پر تبادلہ خیال کرنے کے لیے سی ای اوز اور دفاعی صنعت کے سینئر نمائندوں سے بھی بات چیت کریں گے۔
وزارت خارجہ نے کہا کہ "روم اور پیرس دونوں میں مرکزی وزیر دفاع صنعتی تعاون کے ممکنہ مواقع پر تبادلہ خیال کرنے کے لیے دفاعی صنعت کے سی ای اوز اور سینئر نمائندوں سے بھی بات چیت کریں گے۔" عہدیداروں نے کہا کہ روم اور پیرس میں ہونے والی بات چیت میں فوجی پلیٹ فارم کے مشترکہ تعاون پر بھی تبادلہ خیال ہوگا۔
مزید پڑھیں: ہند-بحرالکاہل کے پیچیدہ چیلنجوں سے مشترکہ طور پر نمٹنے کی ضرورت، راج ناتھ سنگھ
دریں اثناء ڈسالٹ ایوی ایشن کے چیئرمین اور سی ای او ایرک ٹریپیئر اس ہفتے نئی دہلی کا دورہ کرنے والے ہیں تاکہ ہندوستان کی جانب سے رفائیل طیارے کے 26 بحری اقسام کی مجوزہ خریداری کے مختلف پہلوؤں پر بات چیت کریں۔ تاہم ڈسالٹ ایوی ایشن کی جانب سے اس دورے کے بارے میں کوئی باضابطہ اعلان نہیں کیا گیا ہے۔
ہندوستان اور فرانس کے درمیان دفاعی اور اسٹریٹجک تعلقات میں پچھلے کچھ سالوں میں تیزی سے اضافہ ہوا ہے۔ جولائی میں ہندوستان اور فرانس کی جانب سے جیٹ اور ہیلی کاپٹر کے انجنوں اور ہندوستانی بحریہ کے لیے تین اسکارپین آبدوز کی خریداری سمیت زمینی دفاعی تعاون کے منصوبوں کا اعلان کیا گیا۔ واضح رہے کہ ہندوستان نے فرانس سے اس سے پہلے بھی پانچ رفائل جنگی طیارے خریدے تھے جن کو ہندوستانی فضائیہ میں شامل کیا گیا۔
