’امفان‘ کے نقصان سے بچانے کے لئے بی جے پی کارکنان کام میں لگ جائیں: نڈا

بھارتیہ جنتا پارٹی (بی جے پی) کے صدر جگت پرکاش نڈا نے اڈیشہ، مغربی بنگال، تمل ناڈو اور آندھرا پردیش کے پارٹی کارکنوں کو حکم دیا ہے کہ وہ گردابی طوفان ’امفان‘ کے ممکنہ تباہی سے لوگوں کو بچانے کے لئے مقامی انتظامیہ کے ساتھ پوری اہلیت کے ساتھ تعاون دیں۔

بی جے پی صدر نے آج شام تمل ناڈو، اڈیشہ، مغربی بنگال اور پارٹی کے آندھرا پردیش کارکنوں، ریاستی صدور، ریاست کے سکریٹری جنرلوں اور تنظیم کے سکریٹریوں کے ساتھ ویڈیو کانفرنسنگ کے ذریعہ ’امفان‘ گردابی طوفان کے سلسلے میں بات چیت کی۔

مسٹر نڈا نے بتایا کہ جیسا کہ ہم سب جانتے ہیں کہ گردابی طوفان ’امفان‘ تیزی سے ہندوستان کی جانب بڑھ رہا ہے۔ اس طرح کا طوفان صرف دوسری مرتبہ ملک کی طرف بڑھ رہا ہے لیکن وزیراعظم نریندر مودی کی قیادت میں مرکزی حکومت نے متعلقہ ریاستوں سے مل کر اس کے لئے پوری تیاری کرلی ہے۔

انہوں نے کہا کہ وزیراعظم مودی نے ’امفان‘ کے معاملے میں وزارت داخلہ اور نیشنل ڈیزاسٹر منیجمنٹ اتھارٹی کے ساتھ سبھی موضوعات پر تفصیلی بات چیت کی ہے اور آندھرا پردیش، مغربی بنگال اور اڈیشہ سمیت طوفان سے متاثر ریاستوں میں کس طرح تعاون پہنچائی جاسکتی ہے ، لوگوں کو محفوظ مقامات تک پہنچایا جاسکتا ہے، اس پر بھی افسران سے تفصیلی تبادلہ خیال کیا۔

مسٹر نڈا نے کہا کہ بی جے پی نے کل ہی قومی عہدیداروں کی میٹنگ میں ’امفان‘ گردابی طوفان اوراس کے اثرات کے بارے میں غوروفکر کیا گیا ہے اور کل ہی اڈیشہ، مغربی بنگال، تمل ناڈو اور آندھرا پردیش کے پارٹی کارکنوں کو حکم دیا گیا ہے کہ وہ ریاستی حکومتوں، مقامی انتظامیہ اور ڈیزاسٹر منجمنٹ کی ٹیموں کے ساتھ مکمل تعاون کرتے ہوئے پوری طاقت کے ساتھ کاموں میں ابھی سے لگ جائیں۔

مسٹر نڈا نے کہا کہ ہم نے پارٹی کارکنوں سے کہا ہے کہ وہ لوگوں کو محفوظ مقامات تک پہنچانے، ان کے رہنے کھانے پینے اور دیگر سبھی طرح کے راحت کے انتظامات کرنے میں انتظامیہ اور راحت ٹیم کے ساتھ تعاون کرتے ہوئے اپنی مکمل خدمات پیش کریں۔

انہوں نے کہا کہ میرا بھارتیہ جنتاپارٹی کے ہر کارکنوں سے اپیل ہے کہ وہ پوری طاقت کے ساتھ امفان سے عوام کو محفوظ رکھنے کی تیاریاں کریں تاکہ جان ومال کا کوئی نقصان نہ ہو۔