'کیا بھارتی تہذیب انسانوں کے قتل کی اجازت دیتی ہے'

کانگریس کے قومی ترجمان رندیپ سرجے والا نے اپنے پریس کانفرنس میں وزیراعظم مودی کو گنگا جمنی تہذیب کی یاد دلاتے ہوئے کہا "جس نے گنگا جمنی تہذیب کو نہ سمجھا ہو مادر وطن کو کیا سمجھے گا"

ایسے وقت میں جبکہ ملک بھر میں ہجومی تشدد کے واقعات کے خلاف مذمت کا سلسلہ جاری ہے اور مختلف سیاسی پارٹیوں کے ذریعے اپنے منشور میں نفرت پر مبنی ہجومی تشدد کے واقعات کو روکنے کے لیے قانون بنانے کے وعدے کیے جا رہے ہیں، بی جے پی نے اپنے منشور میں ہجومی تشدد کے واقعات کا ذکر تک نہیں کیا اور نہ ہی اس کی روک تھام کے لیے کسی لائحہ عمل کا وعدہ کیا۔

ای ٹی وی بھارت کے ذریعہ پوچھے گئے ایک سوال کے جواب میں کانگریس کے قومی ترجمان رندیپ سرجے والا نے ہجومی تشدد کے موضوع پر کہا کہ کیا بھارتی تہذیب انسان کے قتل کی اجازت دیتی ہے؟ کیا نفرت پر مبنی سیاست ہندوستانی تہذیب کی بنیاد ہو سکتی ہے؟

انہوں نے مزید کہا کہ کاش نریندر مودی جی نے بھگوت گیتا کا مطالعہ کیا ہوتا، بھگوت گیتا میں لکھا ہے کہ دوسرے مذاہب کا احترام کیا جائے۔

سورجے والا نے کہا کہ گنگا جمنی تہذیب اس ملک کی سنسکرتی ہے اور جس شخص کو اس تہذیب کی کوئی سمجھ نا ہو وہ مادر وطن کو کیا سمجھے گا؟