'گھر میں عبادت کے دوران بھی سماجی دوری کا خیال رکھیں'

کورونا وائرس اور لاک ڈاؤن کے پیش نظر رواں برس رمضان المبارک گزشتہ برسوں جیسا نہیں ہوگا کیوں کہ پورے ملک میں لاک ڈاؤن کی وجہ سے ہر طرح کے اجتماع پر پابندی ہے۔

قومی دارالحکومت دہلی کی مسجد فتحپوری کے شاہی امام ڈاکٹر مفتی مکرم احمد نے کہا کہ کورونا وائرس کی وجہ سے حکومت نے لاک ڈاؤن نافذ کیا ہے اور رمضان المبارک میں بھی اس لاک ڈاؤن پر عام دنوں کی طرح ہی عمل کریں۔

انہوں نے کہا کہ اس ماہ مبارک میں تمام عبادات گھروں میں کریں حتیٰ کہ اگر گھر میں بھی باجماعت نماز ہو تو اس دوران بھی سماجی دوری کا خیال رکھا جائے۔

اس کے علاوہ کشمیری گیٹ شیعہ مسجد کے امام مولانا محسن تقوی نے کہا کہ اس مہلک بیماری کی وجہ سے لاک ڈاؤن نافذ کیا گیا ہے اس لیے ماہ مبارک میں بھی اس کی خلاف ورزی نا کریں نیز ڈاکٹرز کی ہدایات پر بھی عمل کریں۔

انہوں نے کہا کہ یہ بات ضرور ہمارے لیے مایوس کن ہے کہ ہم اس ماہ مقدس میں بھی مساجد میں نہیں جا سکیں لیکن یہ قدرت کا ایک طرح کا امتحان ہے اور ہمیں اس کا خیال رکھنا ہے۔