دہلی فسادات اور پولیس کے کردار پر اعلی رہنماؤں کی صدر سے ملاقات

دہلی فسادات اور پولیس کے کردار سے متعلق متعدد سیاسی رہنما آج صدر جمہوریہ رام ناتھ کووند سے ملاقات کریں گے۔ اس وفد میں احمد پٹیل، یچوری، کنیموزی سمیت متعدد رہنما شامل ہیں جو صدر جمہوریہ سے ملاقات کریں گے اور اپنے مطالبات انہیں پیش کریں گے۔

کانگریس پارٹی کے سینیئر رہنما احمد پٹیل، سی پی ایم کے رہنما سیتا رام یچوری ، سی پی آئی رہنما ڈی راجہ، ڈی ایم کے رہنما کنیموزی اور آرجے ڈی رہنما منوج جھا دہلی فسادات معاملے میں پولیس اہلکاروں کے کردار کو لے کر آج صدر جمہوریہ رام ناتھ کووند سے ملاقات کریں گے۔

واضح رہے کہ دہلی پولیس کے خصوصی سیل نے بدھ کے روز شمال مشرقی دہلی کیس کے سلسلے میں چارج شیٹ داخل کی۔ کم از کم 15 افراد کے خلاف یہ چارج شیٹ داخل کی گئی۔

دس ہزار صفحات پر مشتمل اس چارج شیٹ میں جے این یو کے سابق طلبا رہنما عمر خالد اور شرجیل امام کا نام شامل نہیں ہے۔ پولیس نے اس ضمن میں 747 گواہ پیش کیے ہیں جن میں سے 51 لوگوں کے بیانات سی آر پی سی 164 کے تحت درج کیے گئے ہیں۔ دہلی پولیس کی ٹیم مزید کارروائی کے لیے عدالت پہنچے گی۔