کانگریس کی روایتی نشست پر بی جے پی کی بادشاہت

چھتیس گڑھ میں ضلع جشپور سے متصل پڑوسی ریاست اڑیسہ کی سندرگڑھ پارلیمانی سیٹ پر ایک زمانے تک کانگریس کا قبضہ رہا ہے۔

تاہم گزشتہ پانچ انتخابات میں سے چارمیں اس سیٹ پر جیت درج کر کے بی جے پی نے یہاں اپنی بادشاہت قائم کر لی ہے۔
دلچسپ بات یہ ہے کہ 2014 کے عام انتخابات میں مودی لہر میں بی جے پی اڑیسہ کی 21 پارلیمانی سیٹ میں سے صرف سندرگڑھ سیٹ ہی جیت پائی تھی، جبکہ باقی 20 سیٹیں بیجو جنتا دل (بی جے ڈی) نے اپنے نام کی تھی۔
تاریخی حقائق کے مطابق سندرگڑھ میں راج شاہی خاندانوں کی حکمرانی رہی اور 1948 تک یہ گنگ پور ریاست کی راجدھانی رہی۔ قبائلی اکثریتی علاقہ ہونے کی وجہ سے سندرگڑھ لوک سبھا سیٹ درج فہرست قبائل کے لیے مخصوص ہے۔
سنہ 1952 میں پہلے عام انتخابات میں کانگریس نے جیت کی شروعات کی تھی۔ اس کے بعد 1957 اور 1962 میں گنتنتر پریشد نے مسلسل جیت درج کی اور 1967 میں سوتنترپارٹی نے انتخاب جیتا۔