وسطی کشمیر کے بڈگام میں سرچ آپریشن

سکیورٹی فورسز نے وسطی کشمیر کے ضلع بڈگام کے وحدت پورہ کالونی کو محاصرے میں لے کر تلاشی کارروائی کی ہے۔

فوج کی 53 آر آر اور جموں کشمیر پولیس نے مشترکہ کارروائی کرتے ہوئے بڈگام بس اسٹاپ سے کچھ ہی میٹر کی دوری پر واقعہ وحدت پورہ کالونی کو محاصرے میں لیا اور گھر گھر تلاشی کی۔

ذرائع کے مطابق سکیورٹی فورسز کو علاقے میں کچھ مشکوک حرکتوں کی اطلاع موصول ہوئی تھی۔ سکیورٹی فورسز نے اطلاعات پر کارروائی کرتے ہوئے پوری کالونی کا محاصرہ کیا اور تلاشی کارروائی انجام دی۔

واضح رہے کہ بڈگام میں کئی سالوں کے بعد ایسا محاصرہ اور تلاشی کارروائی انجام دی گئی۔ سکیورٹی فورس کی جانب سے یہ محاصرہ ایک گھنٹے سے زائد وقت تک جاری رہا حالانکہ تلاشی کارروائی کے دوران سکیورٹی فورس کو خالی ہاتھ واپس لوٹنا پڑا۔