بڈگام: پبلک ٹوائلیٹ نہ ہونے سے مقامی پریشان

ضلع بڈگام تعمیر ترقی کے اعتبار سے کافی پیچھے ہے۔ ضلع انیس سو اناسی کو وجود میں آیا۔ لیکن وادی کے دوسرے اضلاع کے مقابلے یہ ضلع کافی پسماندہ ہے۔ حالت یہ ہے کہ یہاں پبلک ٹوائلیٹ کی بھی سہولت نہیں ہے۔ ساتھ ہی اولڈ بس اسٹاپ میں لوگوں کو  پینے کے پانی کی بھی سہولت نہیں ہے۔

ضلع بڈگام کے بس اسٹاپ پر پبلک ٹوائلیٹ کی سہولت موجود نہ ہونے سے لوگوں کو پریشانیوں کا سامنا ہے۔ انتظامیہ نے کچھ برس قبل یہاں پبلک ٹائلیٹ کمپلیکس تو تعمیر کیا لیکن عدم توجہی کی وجہ سے اس کی حالت کافی خستہ ہے۔ اس کی دیوار ٹوٹی ہوئی ہے اور کمپلیکس ناکارہ ہو گیا ہے۔ لوگوں کا کہنا ہے انتظامیہ ضلع بڈگام کے ساتھ سوتیلی ماں جیسا سلوک کر رہی ہے۔

پبلک ٹوائلیٹ اور پینے کے پانی کی سہولت موجود نہ ہونے سے خواتین کو زیادہ پریشانیوں کا سامنا ہے۔ انہوں نے انتظامیہ سے اپیل کی کہ اس کی طرف توجہ دی جائے۔

میونسپل کونسل بڈگام ایک طرف یہ دعویٰ کر رہی ہے کہ وہ ٹاؤن کو صاف رکھنے کے لئے ہر وقت کام کرتی ہے لیکن زمینی صورت حال اس کے بر عکس ہے۔ اولڈ بس اسٹاپ کے کنارے گزرنے والی ڈرین کی حالت ساری کہانی بیان کرتی ہے۔ لوگوں کا کہنا ہے کہ جتنی بھی گندگی ہوتی ہے وہ سب اسی میں جاتی ہے جس کی وجہ سے کافی بدبو آتی ہے۔ لیکن میونسپل کونسل اس کی جانب بھی کوئی توجہ نہیں دے رہی ہے۔

ای ٹی وی بھارت نے جب یہ مسئلہ میونسپل کونسل بڈگام کے چیئرمین کے سامنے اٹھایا تو انہوں نے یقین دہانی کرائی کی بہت جلد لوگوں کے مطالبات پورے کیے جائیں گے۔ ساتھ ہی انہوں نے کہا کہ لوگوں کو بھی صفائی پر توجہ دینا چاہیے اور کوڑا کرکٹ ڈرین میں نہ ڈالے۔

بس اسٹاپ کے پاس کے دکاندار اور مسافروں نے انتظامیہ سے اپیل کی ہے کہ یہاں پبلک ٹوائلیٹ، پینے کے پانی کا انتظام اور صاف صفائی کا نظم کریں۔