جموں و کشمیر کے ضلع بڈگام کے خان صاحب علاقے میں سیکیورٹی فورسز نے ہفتہ کی صبح لشکر طیبہ نامی عسکری تنظیم سے وابستہ 5 معاون کو گرفتار کر لیا ہے۔
فورسز نے عسکریت پسندوں کی ایک پناہ گاہ کو بھی تباہ کر لیا ہے اور وہاں سے اسلحہ بارود بر آمد کیا ہے۔
پولیس ذرائع نے بتایا کہ مصدقہ اطلاع موصول ہونے پر بڈگام پولیس، 53 آر آر اور 153 بٹالین سے وابستہ سی آر پی ایف کی ایک ٹیم نے خانصاحب کے آری زال گاؤں سے آپریشن کے دوران لشکر طیبہ سے وابستہ ظہور وانی نامی ایک معاون کو گرفتار کیا۔
انہوں نے کہا کہ گرفتار شدہ معاون کے افشا پر عسکریت پسندوں کی ایک پناہ گاہ کا سراغ ملا جہاں سے اسلحہ کے علاوہ مخلتف قسم کا قابل اعتراض مواد بھی بر آمد کیا گیا۔
پولیس ذرائع نے بتایا کہ تحقیقات کے دوران سیکورٹی فورسز نے عسکریت پسندوں کے مزید چار معاون کو گرفتار کیا جن کی شناخت یونس میر، اسلم شیخ، پرویز شیخ اور رحمان لون ساکنان خانصاحب بڈگام کے بطور ہوئی ہے۔
انہوں نے بتایا کہ عسکری معاون کا یہ گروپ اس علاقے میں گزشتہ کئی ماہ سے سرگرم تھا۔
دریں اثنا اس ضمن میں پولیس اسٹیشن خانصاحب میں ایک کیس درج کیا گیا ہے۔