بڈگام: منشیات فروشی کے الزام میں دو افراد گرفتار

جموں و کشمیر کے ضلع بڈگام میں پولیس نے منشیات کے خلاف جنگ جاری رکھتے ہوئے دو ملزمین کو گرفتار کیا۔ وہیں، پولیس نے ان کے پاس سے مختلف ممنوعہ ادویات برآمد کرنے کا دعوی کیا ہے۔

بڈگام پولیس کی ایک خصوصی ٹیم نے بٹہ ہار پر چیکنگ کے دوران ایک انووا گاڑی کو روکا جس میں دو افراد سوار تھے۔ ان کی تلاشی لینے پر ان کی تحویل سے ممنوعہ دوا (سائکوٹروپک) برآمد کی گئی۔ اس کے علاوہ کوڈین کی چھ بوتلیں (کنٹرولڑ کوڈین بیسڑ سیرپ) ایک پانی کی بوتل جو کہ ایک لیٹر کوڈین بیسڑ سیرپ سے بڑی تھی اور دوا الپروزولام کی 300 ٹیبلٹس بھی برآمد کی گئیں۔

پولیس کے مطابق ان ملزمین کی شناخت شبیر احمد ڈار ولد محمد عبد اللہ ڈار ساکن ہمہامہ اور عادل منظور پال ولد منظور احمد پال ساکن نارکرہ بڈگام کے طور پر ہوئی ہے۔ پولیس نے ان کے پاس سے اِنووا کار کو بھی ضبط کیا ہے۔

اس ضمن میں پولیس اسٹیشن بڈگام میں ایک ایف آئی آر درج کی گئی ہے جو کہ این ڈی پی ایس ایکٹ کے تحت رجسٹر ہوا ہے۔ اس معاملے میں مزید تحقیقات جاری ہیں۔