بڈگام: بھیڑوں کو پالنے کے تعلق سے بیداری کیمپ

ضلع ترقیاتی کمشنر بڈگام شہباز احمد مرزا نے کہا کہ موجودہ وقت میں سرکاری نوکریاں کافی کم ہیں اور نوجوانوں کی یہ کوشش ہونی چاہئے کہ خود اپنا روزگار پیدا کرنے کی کوشش کریں اورسرکاری اسکیموں سے فائدہ اٹھائيں۔

بڈگام میں آج بھیڑ پالنے والوں کے لیے بیداری پروگرام کا انعقاد کیا گیا۔ اس موقع پر ضلع ترقیاتی کمشنر بڈگام شہباز احمد مرزا نے کہا کہ زرعی سرگرمیوں کے ساتھ ساتھ بھیڑ پالنے میں بھی روزگار کے وسیع امکانات ہیں۔

شیخ العالم ہال بڈگام میں منعقد ہوئے اس پروگرام میں ڈسٹرکٹ شیپ ہسبنڈری افسر بشارت امین کے علاوہ بڑی تعداد میں بھیڑ پالنے والے اور ابھرتے ہوئے تاجروں نے شرکت کی۔ اس موقع پرڈی سی بڈگام نے ڈسٹرکٹ شیپ ہسبنڈری آفس کو پروگرام منعقد کرنے پر مبارکباد پیش کی۔

انہوں نے کہا کہ موجودہ وقت میں سرکاری نوکریاں کافی کم ہیں اور نوجوانوں کی یہ کوشش ہونی چاہئے کہ خود اپنا روزگار پیدا کرنے کی کوشش کریں اورسرکاری اسکیموں سے فائدہ اٹھائيں۔

انہوں نے یہ بھی کہا کہ ایگریکلچر، ہارٹیکلچر، فلوریکلچر بھیڑ پالنا وغیرہ میں اپنی طاقت لگانا کافی فائدہ مند ثابت ہوگا۔ شہباز مرزا نے ڈسٹرکٹ شیپ ہسبنڈری آفس پر زور دیا کہ نئی ٹیکنالوجی کا استعمال کریں تاکہ نوجوان بھیڑ پالنے اور دیگر زرعی سرگرمیوں کی طرف راغب ہو جائیں۔ انہوں نے نوجوانوں پر بھی زور دیا کہ وہ آگے آئیں اور ان سرگرمیوں میں حصہ لیں۔

انہوں نے یقین دلایا کہ ضلع انتظامیہ ہمیشہ نوجوانوں کے ساتھ ہے۔ اس موقع پر ڈی سی نے مستحقین میں بھیڑوں کی بہتر صحت کے لئے میڈیکل کٹس بھی تقسیم کیے۔