پٹنہ: یوتھ کانگریس نے گاندھی جی کی سالگرہ پر ترنگا ریلی نکالی

یوتھ کانگریس بہار کے کارگزار صدر دولت امام نے کہا کہ ''یہ اس ملک کی خوبصورتی ہے کہ یہاں سبھی مذاہب کے لوگ مل جل کر رہتے ہیں۔ لیکن آر ایس ایس فکر کے لوگ اس متنوع ملک کے لیے خطرناک ہیں اور ان کی فکر کو ہمیں ہر حال میں کچلنا ہوگا۔''

ریاست بہار کے ضلع پٹنہ میں آج بابائے قوم کی سالگرہ کے موقع پر شہر کے مختلف سیاسی دفاتر، سرکاری اور غیر سرکاری دفاتر میں لوگوں نے گاندھی جی کو خراج عقیدت پیش کرنے کے لیے تقریبات کا اہتمام کیا۔ اس موقع پر یوتھ کانگریس کی جانب سے آج صداقت آشرم سے سو میٹر کا ترنگا یاترا نکالا گیا، جو پیدل مارچ کرتے ہوئے گاندھی میدان میں نصب گاندھی جی کے قد آدم مجسمہ تک پہنچی۔ یہاں کانگریس کارکنان نے گاندھی جی کو خراج عقیدت پیش کرتے ہوئے مجسمہ کے اوپر گل پوشی کی اور گاندھی جی امر رہے کے نعرے لگائے۔

اس موقع پر یوتھ کانگریس کے ریاستی صدر گنجن پٹیل نے کہا کہ یہ ملک گاندھی جی کے نظریات سے چلے گا، یہ ملک مولانا ابوالکلام آزاد اور بھگت سنگھ کے اصولوں کی وجہ سے باقی ہے۔ گاندھی جی نے ملک کی بقا و سالمیت کے لئے جو پیغام دیا ہے وہ کسی مخصوص مذاہب کے لئے نہیں بلکہ ہندوستان میں بسنے والے تمام مذاہب کے ماننے والوں کے لئے ہے۔ مگر آج کچھ شرپسند قسم کے لوگ یہاں کے تمام مذاہب کے لوگوں "نفرت ڈالو راج کرو" والا منصوبہ کے تحت کام کر رہے ہیں مگر ایسے لوگ کبھی کامیاب نہیں ہوں گے۔

یوتھ کانگریس بہار کے کارگزار صدر دولت امام نے کہا کہ یہ اس ملک کی خوبصورتی ہے کہ یہاں سبھی مذاہب کے لوگ مل جل کر رہتے ہیں، گاندھی جی نے آپسی محبت اور بھائی چارے کا جو پیغام دیا تھا انہیں خطوط پر آج بھی ہندوستان قائم ہے اور آگے بھی رہے گا۔

دولت امام نے کہا کہ آر ایس ایس فکر کے لوگ اس ملک کے لئے خطرناک ہیں، اس فکر کو ہمیں ہر حال میں کچلنا ہوگا۔