بیت الخلا نہ ہونے پر شوہر کے خلاف شکایت درج

ریاست بہار کے ضلع روہتاس کے دینارا علاقہ بھانس تھانے کی ایک خاتون نے اپنے شوہر اور سسرال کو صرف اس وجہ سے چھوڑ دیا کیونکہ اس کے سسرال میں بیت الخلا نہیں تھا۔ خاتون نے خواتین کی ہیلپ لائن پر بھی اس سلسلے میں شکایت درج کرا دی۔

جوہی دیوی کی سنہ 2017 میں امرجیت کمار سے شادی ہوئی تھی۔ سسرال میں بیت الخلا نہ ہونے کی وجہ سے وہ بہت پریشان تھی۔ اس بارے میں اکثر شوہر اور بیوی کے مابین جھگڑا ہوتا رہتا تھا۔ مسلسل جھگڑوں سے تنگ آکر خاتون نے اپنے میکے چلی گئی اور خواتین ہیلپ لائن نمبر پر اپنے شوہر کے خلاف شکایت درج کرا دی۔ شوہر اور بیوی دو برس سے الگ رہ رہے ہیں۔

امرجیت کی اہلیہ جوہی دیوی نے کہا کہ جب تک بیت الخلا تعمیر نہیں ہو جاتا، میں اپنے سسرال نہیں جاؤں گی۔ اس نے بتایا کہ ہماری شادی کے دو سال ہو چکے ہیں لیکن بیت الخلا نہ ہونے کی وجہ سے اب تک سسرال نہیں گئی ہوں۔

اس معاملے میں خواتین ہیلپ لائن کی منیجر آفرین ترنم نے شوہر اور بیوی کو اپنی آفس میں پیش ہونے کے لیے نوٹس جاری کیا تھا۔ آفرین نے بتایا کہ دونوں فریقین کے موجود ہونے کے بعد یہ نتیجہ اخذ کیا گیا ہے کہ گھر میں بیت الخلا نہ ہونے کی وجہ سے تنازع پیدا ہوا ہے۔
شنوائی کے دوران شوہر امرجیت کمار نے جلد ہی بیت الخلا تعمیر کرانے پر راضی ہوا جس کے بعد جوہی دیوی اپنے سسرال جانے کے لیے رضامند ہوگئی۔

میرا کنبہ ایک تھا لہذا جگہ نہیں تھی۔ اب جب کہ مجھے جگہ مل گئی ہے تو میں بیت الخلا تعمیر کروں گا۔ شادی کے بعد بیوی صرف ایک ہی بار سسرال آئی ہے۔