گیا کے ایک گاؤں میں ووٹنگ بائیکاٹ

ریاست بہار کے ضلع گیا میں پہلے مرحلے میں 11 اپریل کو ووٹنگ ہوئی تھی، گاؤں تک پکی سڑک نہیں ہونے کی وجہ سے بیلا گاؤں کے عوام نے رواں برس ووٹ نہیں ڈالا۔

اس حقیقت سے انکار نہیں کیا جا سکتا ہے کہ بہار میں سڑکوں کے معیار میں بہتری آئی ہے لیکن اب بھی متعدد گاؤں ایسے ہیں جہاں سڑک نہیں ہے۔ ایسا ہی ایک گاؤں گیا ضلع کے شیر گھاٹی سب ڈیویژن میں ہے۔ بیلا نام کے اس گاؤں کے عوام نے رواں برس ووٹنگ کا بائیکاٹ کیا۔ مقامی لوگوں کا کہنا ہے کہ سڑک نہیں ہونے کی وجہ سے اکثر حادثے پیش آتے رہتے ہیں۔

سڑک سے گاؤں تک تقریباً چار کلو میٹر کا راستہ ہے۔ مقامی لوگوں کی مانے تو بچوں کی پڑھائی سے لیکر شادی تک میں دشواری کا سامنا کرنا پڑتا ہے۔

یہاں کے لوگ میڈیا سے بھی خاصے ناراض ہیں۔ ان کا کہنا ہے کہ صحافی آتے ہیں خبر بناتے ہیں لیکن وہ شائع نہیں کی جاتی ہے۔

ضلع انتظامیہ نے بیلا گاؤں کے لوگوں کو ووٹنگ کے لیے منانے کی کوشش بھی کی لیکن اب گاؤں کے عوام اس قدر برہم ہیں کہ انہوں نے کسی بھی قسم کے انتخابات میں ووٹ نہیں ڈالنے کا فیصلہ کر رکھا ہے۔