گیا: نوے برس کے ناوک حمزہ پوری نے حق رائے دہی کا استعمال کیا

گیا میں پنچایت الیکشن کے چھٹے مرحلے میں نوجوانوں کے ساتھ عمر رسیدہ افراد بھی اپنے حق رائے دہی کا استعمال کر رہے ہیں۔ شیرگھاٹی سب ڈویژن کے آمس بلاک کے اردو پردہ گرلز اسکول بوتھ پر بہار کے معروف ادیب و شاعر ناوک حمزہ پوری ووٹ ڈالنے کے لیے قطار میں کھڑے ہو کر اپنی باری کا انتظار کرتے نظر آئے۔

ریاست بہار کے ضلع گیا کے تین بلاکس میں دو پہر تین بجے تک پچاس فیصد ووٹنگ ہوچکی ہے۔ ووٹنگ کے دوران مسلم ووٹرز نے بھی جوش و خروش کے ساتھ حق رائے دہی کا استعمال کیا۔ اس دوران بہار کے نوے برس کے معروف ادیب و شاعر ناوک حمزہ پوری نے اردو پردہ گرلز اسکول پہنچ کر اپنے حق رائے دہی کا استعمال کیا۔


گیا میں پنچایت الیکشن کے چھٹے مرحلے میں جہاں نوجوانوں نے جوش و خروش کے ساتھ ووٹنگ کی ہے۔ وہیں عمر رسیدہ افراد بھی اس سے پیچھے نہیں رہے۔ شیر گھاٹی سب ڈویژن کے آمس بلاک کے اردو پردہ گرلز اسکول بوتھ پر بہار کے معروف ادیب و شاعر اور دو سو کتابوں کے مصنف ناوک حمزہ پوری ووٹ ڈالنے کے لیے قطار میں کھڑے ہو کر اپنی باری کا انتظار کرتے نظر آئے۔

ناوک حمزہ پوری نوجوانوں کے لیے ایک بہترین مثال ہیں۔ نوے برس کی عمر میں بھی ناوک حمزہ پوری سماجی کاموں میں معاونت کے لیے تیار ہوتے ہیں۔ طبیعت ناساز ہونے کے باوجود وہ اپنے ووٹ کا استعمال کر رہے ہیں۔

اس دوران انہوں نے ای ٹی وی بھارت سے بات کرتے ہوئے کہا کہ ان کے زمانہ میں ووٹنگ کافی پرسکون اور عزت کے ساتھ ہوتی تھی۔ آج حالات مختلف ہیں۔ امیدوار اتنے ہوتے ہیں کہ اچھے برے کا فرق کرنا آسان نہیں ہوتا ہے۔

فرضی ووٹنگ پر انہوں نے کہا کہ یہ ہر دور سے ہوتی آرہی ہے، تاہم آج اس کا طریقہ بدل گیا ہے۔ ایمانداری کے ساتھ سب کو کام کرنا چاہیے۔ الیکشن کسی بھی عہدے کے لیے ہو اپنے حق کا استعمال ہر حال میں کرنا چاہیے کیونکہ اچھے امیدوار کا انتخاب آپ کے ہاتھوں میں ہے۔