بہار: سیلاب سے 20 لاکھ افراد متاثر، 14 ہلاک

بہار میں پڑوسی ملک نیپال سے آنے والی ندیوں جس میں کملہ بلان ندی خاص طور پر قابل ذکر ہے، نے ریاست میں سیلاب کا قہر برپا کر رکھا ہے اس تباہی میں ریاست کے سیمانچل اور کوسی علاقے کے تقریباً 20 لاکھ افراد متاثر ہوئے ہیں۔

ریاست میں سیلاب کے سبب اب تک 14 افراد کے ہلاک ہونے کی خبر ہے، جس میں 12 اضلاع، 68 بلاک اور 444 پنچایت متاثر ہوئے ہیں ریاست کے وزیر اعلی نتیش کمار افسران کے ساتھ کئی دنوں سے ہیلی کاپٹر کے ذریعے متاثرہ علاقوں کا دورہ کرتے ہوئے افسران کو راحت اور امدادی کاموں کی ہدایت دے رہے ہیں۔

محکمہ آفات منیجمنٹ کے پرنسپل سیکریٹری امرت پرتیائے کا کہنا ہے کہ پڑوسی ملک نیپال سے آنے والی بیشتر ندیوں کے سطح آب میں مسلسل ہورہی بارش کی وجہ سے اچانک اضافہ ہوا ہے جس کے سبب ریاست میں اتنی بڑی تباہی ہوئی ہے۔

سرکاری اعداد و شمار کے مطابق تقریبا 20 لاکھ افراد اس سیلاب سے متاثر ہیں حکومت نے کئی علاقوں میں عوامی رسوئی کا نظم کیا ہے۔

امرت پرتیائے نے بتایا کہ بہار کے کو سی اور سیمانچل علاقے میں کئی بستیاں بہہ گئیں جس کے سبب ریاست کے 12 اضلاع 68، بلاک اور 444پنچایت میں 20 لاکھ لوگ متاثر ہوئے ہیں۔

اب تک 14 لوگوں کے جاں بحق ہونے کی حکومت نے اطلاع دی ہے پرنسپل سیکریٹری نے بتایا کہ کئی علاقوں سے پانی تیزی سے گھٹ رہا ہے جہاں لوگ گاؤں سے نکل نہیں پا رہے ہیں انہیں محفوظ مقامات پر رکھا گیا ہے۔