مقدمات کے حل میں تیزی لائیں تھانہ صدور: ٹاؤن ڈی ایس پی

ارریہ میں ایک لمبے عرصے بعد ضلع انتظامیہ کی جانب سے ماہانہ بڑھتے کرائم پر مذاکرہ کا اہتمام کیا گیا جس میں بطور خاص میڈیا اہلکاروں کو بھی دعوت دی گئی۔ اس سے قبل صرف ذرائع کے مطابق ہی خبریں چلا کرتی تھیں۔

ریاست بہار کے ضلع ارریہ میں گزشتہ چند سالوں میں بند ہوئے مذاکرہ کو ٹاؤن ڈی ایس پی پشکر کمار کی ہدایت پر دوبارہ سے شروع کیا گیا۔ جس میں ہر ماہ کے آخر میں تھانہ کی جانب سے ایک مہینے کی کارگزاری پیش کی جائے گی کہ ایک مہینے میں کتنے معاملات درج ہوئے، نیز کرائم کی شرح کیا رہی۔

ٹاؤن ڈی ایس پی دفتر میں منعقدہ اس مذاکرہ میں ضلع کے تمام تھانہ صدور شامل ہوئے اور ایک مہینے کی رپورٹ پیش کی۔ مذاکرہ میں ٹاؤن ڈی ایس پی پشکر کمار نے کہا کہ اب کسی ذرائع سے نہیں بلکہ ایک مہینے میں جو ہماری کارکردگی رہی وہ ہم خود میڈیا کے سامنے پیش کریں گے تاکہ عوام ہمارے کام کاج کا صحیح اندازہ لگا سکے۔

اس وقت ضروری ہے کہ تمام تھانہ صدور اپنے اپنے حلقوں میں نظم و نسق بنائے رکھیں اور گشتی تیز کریں۔ ساتھ ہی جو ملزم پکڑ سے باہر ہیں انہیں فوراً جیل کی سلاخوں کے پیچھے ڈالیں۔

پشکر کمار نے تھانہ صدور کی فائلیں دیکھتے ہوئے کہا کہ زیر التوا مقدمات کو جلد سے جلد حل کریں، ساتھ ہی شراب مافیاؤں کے خلاف کوئی نرمی نہ برتی جائے بلکہ ان کے خلاف سخت کارروائی ہو، پکڑ کے لئے چھاپہ ماری میں بھی تیزی لائیں۔

پشکر کمار نے کہا کہ اعلیٰ افسران کی جانب سے ملنے والی ہدایات پر سختی سے عمل کریں، نہیں کرنے والے افسران پر بھی سخت کارروائی ہوگی۔ ساتھ ہی سماج میں ہو رہے چھوٹے چھوٹے واقعات پر بھی نظر بنائیں رکھیں تاکہ ان پر روک لگائی جا سکے۔

مذاکرہ میں برداہا تھانہ صدر سوداما سنگھ، سونامانی تھانہ صدر نند کشور نندن، پلاسی تھانہ صدر اوم پرکاش، بیرگاچھی تھانہ صدر ہریندر سنگھ، تاراباڑی تھانہ صدر ونود کمار، رانی گنج تھانہ صدر شیام نندن کے علاوہ درجنوں پولس اہلکار موجود تھے۔