وزیرتعلیم مولانا ابوالکلام آزاد کی یاد میں تقریب

ریاست بہار کے بھاگلپور میں بھارت کے پہلے وزیرتعلیم مولانا ابوالکلام آزاد کی یوم پیدائش کے موقع پر سیمینار کا انعقاد کیا گیا۔

اس موقع پر ملک کے پہلے وزیر تعلیم مجاہد آزادی امام الہند مولانا ابوالکلام آزاد کو یاد کیا گیا۔

بھاگلپور کے مسلم اقلیتی ہاسٹل میں طلباء کی طرف سے منعقدہ پروگرام میں امام الہند و مجاہد آزادی مولانا ابواکلام کی قربانیوں اور ملک و قوم کی تئیں ان کی خدمات کو یاد کیا گیا۔

اس موقع پروگرام کی نظامت کے فرائض انجام دے رہے اقلیتی ہاسٹل کے کوآرڈی نیٹرجناب نعیم نے مولانا ابولکلام آزاد کی حیات و خدمات پر روشنی ڈالتے ہوئے کہا کہ آج ملک بھر میں اگر اقلیتوں کے اسکول، کالجز و دیگرے ادارے چل رہے ہیں تو یہ ساری چیزیں ملک کے پہلے وزیر تعلیم مولانا ابوالکلام آزاد انتھک کوششوں کا نتیجہ ہیں۔

انہوں نے کہا کہ طلباء کو چاہئے کہ اس عبقری شخصیت کا مطالعہ کرے اور ان کو اپنا رول ماڈل بنائے۔

مہمان خصوصی کی حیثیت سے پروگرام میں شامل پروفیسر شاہد رضا جمال نے مولانا ابوالکلام آزاد کی حیات و خدمات پر روشنی ڈالتے ہوئے کہا کہ ایسی شخصیات صدیوں میں پیدا ہوتی ہیں۔
انہوں نے بھارت کو آئی آئی ایم، آئی آئی ٹی، یوجی سی اور اس طرح کے تعلیمی ادارے اور ڈھانچے تیار کروائے جس کی بنیاد پر آج ترقی کی راہ پر گامزن ہے۔

ان کا یہ بھی کہنا تھا کہ اگربھارت میں اتنی بڑی تعداد میں مسلمان موجود ہیں تو اس کی ایک بڑی وجہ مولانا ابوالکلام آزاد کی کاوشیں ہیں۔

انہوں نے کہا مولانا ابولکلام آزاد کی شخصیت کسی ایک پہلو پر محیط نہیں تھی بلکہ ہر جہت میں ان کا نمایاں کردار رہا ہے اور اس عبقری شخصیت سے طلباء کو واقفیت ہونی چاہئے۔

آخر میں این سی یو ای ایل کے رکن التمش بہاری نے بھی طلباء کے سامنے اپنی باتیں رکھیں اوراقلیتی طلباء سے اپنے حقوق کے تئیں خود بیدار ہونے اوردوسروں کو بیدار کرنے کی اپیل کی۔

مہمانان کے علاوہ ہاسٹل میں مقیم چند طلباء نے بھی اپنی باتیں رکھیں اور اپنے خیالات کا اظہار کیا جس میں محمد انعام اور ابرار احمد قابل ذکر ہیں۔

جن کے تقریر کی سبھی ستائش کی۔ اس موقع پر بڑی تعداد میں طلباء نے پروگرام میں شرکت کی۔