عالمی یوم خواتین پر ویمنس کالج کی طالبات نے دکھائے اپنے ہنر

عالمی یوم خواتین کے موقع پر ریاست بہار کے بھاگلپور کے معروف ادارہ سندروتی مہیلا کالج میں بھی رنگا رنگ پروگرام منعقد کیے گئے۔ جس میں طالبات نے اپنے ہنر سے لڑکیوں اورعورتوں کے جذبات کا اظہار کیا۔

نیہا کماری کی ٹیم نے بہترین انداز میں کویتا سنائی جسے وہاں موجود سامعین نے خوب پسند کیا۔ اس کےعلاوہ ریشمی اور اس کی سہیلیوں نے معاشرے میں خواتین کو جن پریشانیوں کا سامنا کرنا پڑتا ہے، اسے اداکاری کے ذریعہ پیش کرنے کی کوشش کی۔

یہاں جمع خواتین کا ماننا تھا کہ عورتوں کے تئیں سماج کا نظریہ بدلا ہے لیکن اب بھی خواتین کے تعلق سے ایک خاص طبقہ میں اتنی بہتری نہیں آئی ہے جتنا کہ آنا چاہئے۔

وہیں لڑکیوں کا ماننا ہے کہ گھر میں بھلے ہی لڑکوں اور لڑکیوں میں امتیازی سلوک نہ برتا جاتا ہو لیکن کچھ لوگ اب بھی ایسے ضرور ہیں جو لڑکیوں کی تعلیم و ترقی میں حائل ہونے کی کوشش کرتے ہیں۔

لہذا انہیں یہ سمجھنے کی ضرورت ہے کہ تعلیم اور ترقی کے شعبہ میں آگے بڑھنے کا جتنا حق لڑکوں کو ہے اتنا ہی لڑکیوں کو بھی ہے۔

یوم خواتین پر لڑکیوں اور عورتوں سے بات چیت کی بنیاد پر اندازہ ہوتا ہے کہ لڑکوں اور لڑکیوں میں تفریق میں کمی تو ضرور آئی ہے اور کافی حد تک سماج کا نظریہ بھی بدلا ہے لیکن اس میں مزید پیش رفت کی ضرورت ہے۔