لاک ڈاؤن کے بعد سے تقریباً 90 فیصد لوگ اپنے گھروں میں ہیں مگر لاک ڈاؤن کو آگے بڑھاکر اسے تین مئی تک کردیا گیا ہے۔
وزیراعظم نریندر مودی نے آج صبح 10 بجے لاک ڈاؤن کی میعاد میں توسیع کرتے ہوئے اسے تین مئی تک کرنے کا اعلان کیا اور 20 اپریل کے بعد سے تھوڑی نرمی برتی جائے گی۔
حالانکہ بہار کے ضلع ارریہ کے لوگ اس بات کا شکریہ ادا کر رہے ہیں کہ اب تک ضلع میں کوئی بھی کورونا کا مریض نہیں پایا گیا ہے لیکن اس کے باوجود اب یہ فکر ستانے لگی ہے کہ آگے ان کی زندگی کیسے چلے گی۔
ارریہ کے زیادہ تر لوگ دوسری ریاستوں میں پھنسے ہوئے ہیں جو پریشان حال ہیں اور حکومت و انتظامیہ سے لگاتار مدد کی اپیل کررہے ہیں، سینکڑوں کی تعداد میں لوگ ارریہ میں کام کرنے والی این جی او، سرکاری تنظیم و عوامی نمائندوں سے فون کر مدد کی فریاد کر رہے ہیں۔
فاربس گنج کے گلزار نے فون پر بتایا کہ وہ اہل خانہ سمیت گجرات میں پھنسے ہوئے ہیں، گھر جانے کا کوئی ذریعہ نہیں ہے، میڈیا سے رابطہ کرنے کے بعد بہار کا ہیلپ لائن نمبر ملا جس پر انہوں نے اپنے مسائل آگاہ کیا ہے۔
وہیں دوسری جانب جوکی ہاٹ کے باشندہ محمد مجیب جو مزدوری کے لیے لاک ڈاؤن سے چند دن قبل دہلی گئے تھے انہوں نے بھی فون پر بتایا کہ ان کے پاس کھانے پینے تک کے سامان نہیں ہیں، بہار بھون سے رابطہ کیا مگر اب تک کسی طرح کی کوئی امداد نہیں پہنچی ہے۔
اسی طرح ارریہ کے کئی لوگ ہیں جو دیگر ریاستوں میں پھنسے ہیں اور لاک ڈاؤن بڑھائے جانے کی خبر سے پریشان ہیں۔
