پولیس جیپ اور ٹرک کے درمیان ٹکر، داروغہ ہلاک، تین زخمی

بہار میں اورنگ آباد ضلع کے مفصل تھانہ علاقہ کے کھیرا گاﺅں کے نزدیک نیشنل ہائی وے نمبر 139 پر دیر رات پولیس جیپ اور ٹرک کے مابین ہوئی ٹکر میں داروغہ کی موت ہوگئی اور تین دیگر پولیس عملے زخمی ہوگئے۔

اورنگ آباد کے سب ڈویژنل پولیس افسر انوپ کمار نے بتایاکہ ضلع کے اوبرا تھانہ کے داروغہ امت کشور رجک (35) ، معاون پولیس سب انسپکٹر للن پرساد یادو، امیش رام اور منشی دنیش کمار کے ساتھ پیکس انتخاب سے متعلق کام سے اورنگ آباد سے اوبرا لوٹ رہے تھے تبھی پولیس جیپ اور ٹرک کے مابین ٹکر ہو گئی۔ حادثہ میں جیپ پر سوار داروغہ سمیت چار پولیس عملے زخمی ہوگئے۔
مسٹر کمار نے بتایاکہ سبھی زخمیوں کو اورنگ آباد صدر ہسپتال میں داخل کرایا گیا جہاں ابتدائی علاج کے بعد داروغہ امت کشور رجک کو بہتر علاج کے لیے نارائن میڈیکل کالج جمو ہار ریفر کیا گیا۔ علاج کے دوران امت کشور رجک کی موت ہوگئی۔ امت کشور رجک 2009 بیچ کے داروغہ تھے اور وہ پٹنہ ضلع کے رہنے والے تھے۔