بی جے پی رہنما کا نتیش کمار سے استعفیٰ کا مطالبہ

بہار کے ضلع سیوان سے بی جے پی ایم ایل سی نے ریاست میں چمکی بخار سے ہوئی بچوں کی اموات اور بڑھتے جرائم کی واردات پر وزیر اعلیٰ نتیش کمار کی سخت نکتہ چینی کرتے ہوئے استعفیٰ کا مطالبہ کیا ہے۔

بی جے پی ایم ایل سی ٹونا جی پانڈے کا کہنا ہے کہ بہار میں بچوں کی موت کا سلسلہ جاری ہے، طبی نظام درہم برہم ہے، آئے دن جرائم ہورہے ہیں اور سیوان میں جرائم پر روک لگانا مشکل ہوگیا ہے۔

انھوں نے نتیش کمار پر مزید الزامات عائد کرتے ہوئے کہا کہ' وزیراعلی میڈیا کے سوالات سے پر خاموشی اختیار کیے ہوئے ہیں ایسی حالت میں انھیں اپنے عہدے سے استعفی دے دینا چاہیے۔

واضح رہے کہ بے جے پی رہنما ٹونا جی پانڈے ریاست میں بچوں کی اموات اور بہار کی خراب ہوتی قانونی صورت حال کا ذمہ دار وزیراعلی نتیش کمار کو قرار دے رہے ہیں۔

اس سے قبل آر ایل ایس پی کے رہنما اوپیندر کشواہا نے بھی ریاست کی موجودہ صورت حال کے مد نظر نتیش کمار سے استعفی کا مطالبہ کیا تھا۔