نتیش کمار نے سپریم کورٹ کے فیصلے کا خیرمقدم کیا

ریاست بہار کے وزیراعلی نتیش کمار نے سپریم کورٹ کے فیصلے کا خیرمقدم کرتے ہوئے کہا کہ اب اس معاملے پر کوئی تنازعہ نہیں ہونا چاہئے۔

ریاست بہار کے وزیر اعلی نتیش کمار نے رام مندر سے متعلق سپریم کورٹ کے فیصلے کا خیرمقدم کرتے ہوئے کہا کہ یہ عدالت کا فیصلہ ہے اور سب کو اس فیصلے کا احترام کرنا چاہئے۔

نتیش کمار نے یہ بھی کہا کہ تمام لوگوں کو یہ فیصلہ لینا چاہئے کہ اب اس معاملے سے متعلق کوئی تنازعہ نہیں ہوگا حالانکہ میری ذاتی رائے تھی کہ دونوں فریق مل بیٹھ کر اس معاملے کو سلجھا لیتے۔

اطلاع کے مطابق نتیش کمار مغربی چمپارن کے دورے پر تھے جہاں والمکی نگر مندر میں پوجا کرنے کے بعد نتیش کمار نے صحافیوں سے بات کرتے ہوئے رام مندر معاملے پر اپنا رد عمل ظاہر کیا،جس میں انہوں نے کہا کہ عدالت کے فیصلے کا احترام کیا جائے گا۔

انہوں نے عام لوگوں سے معاشرتی ہم آہنگی اور امن کو برقرار رکھنے کی اپیل بھی کی، اس کے بعد وہ پٹنہ کے لیے روانہ ہو گئے ۔