گیا: پنچایت الیکشن میں مسلم امیدواروں کی نمائندگی بڑھی

گیا میں پنچایت الیکشن کے چوتھے مرحلے میں تین مسلم امیدواروں نے مکھیا اور ایک نے ضلع پریشد کی سیٹ پر جیت درج کی ہے۔ اب تک چار مرحلے میں کل پانچ مکھیا، دو ضلع پریشد اور دس پنچایت سمیتی اور کئی وارڈ کے عہدے پر مسلم امیدواروں نے جیت درج کیا ہے۔

ریاست بہار کے گیا میں اب تک چار مرحلے میں کل نو بلاکس کے 129 پنچایتوں کے لیے ووٹنگ اور کاؤنٹنگ ہوچکی ہے، جس میں بتھانی بلاک کے دو پنچایت منیارا سے شمس تبریز شمس، بتھانی کے سرین پنچایت سے ترنم خاتون نے مکھیا کے عہدے پر جیت درج کی ہے۔

اسی طرح بتھانی سے ضلع پریشد کی سیٹ پر گلفشاں خاتون نے جیت درج کی۔ وہیں گروا بلاک کے کلونا پنچایت سے پرویز خان نے دوسری مرتبہ جیت درج کی ہے۔ پرویز خان کے خاندان کے لوگ پچاس سال سے مکھیا کے عہدے پر جیت درج کرتے آرہے ہیں۔

اس کے علاوہ رگھوناتھ کھاپ پنچایت سے اظہر انصاری نے جیت درج کی ہے، اس پنچایت میں پچاس برسوں بعد کسی مسلم رہنما نے جیت درج کی ہے جب کہ اسی طرح کونچ بلاک کے تیاری پنچایت سے سبیلا بانو نے مکھیا کے عہدے پر جیت درج کی ہے۔

وہیں گروا بلاک کے ایک علاقے سے موجودہ ضلع پریشد کی چیئرمین کورونا دیوی کو شکست دے کر نازیہ حسن نے ایک ہزار سے زیادہ ووٹوں سے جیت درج کی ہے۔ اب تک دو ضلع پریشد اور پانچ مکھیا کی سیٹ پر مسلم امیدواروں نے جیت درج کی ہے۔

واضح رہے کہ مسلم نمائندوں کی جیت کا سلسلہ تیسرے مرحلے سے شروع ہوا تھا، پہلے مرحلے اور دوسرے مرحلے میں ایک بھی مسلم امیدوار نے مکھیا اور ضلع پریشد کی سیٹ پر جیت درج نہیں کیا تھا۔