مغربی چمپارن میں منی گن فیکٹری کا پردہ فاش

بہارمیں مغربی چمپارن ضلع کے بھیتہا تھانہ علاقہ سے پولیس نے غیر قانونی طور سے چل رہے ایک منی گن فیکٹری کا پردہ فاش کرکے دو لوگوں کو گرفتار کیا ہے۔

بگہا سب ڈویژنل پولیس افسر کیلاش پرساد نے پیر کے روز پریس کانفرنس میں بتایاکہ اطلاع کی بنیاد پر ہتھوا گاﺅں میں اتوار کو چھاپے ماری کرکے ایک غیر قانونی منی گن فیکٹری کا پردہ فاش کیا گیا۔

پولیس نے موقع سے منی گن فیکٹری کے مالک ہری شرما اور کاریگر ستن شرما کو گرفتار کرلیا ۔ گرفتاردونوں افراد ہتھوا گاﺅں کے رہنے والے ہیں۔

مسٹر پرساد نے بتایاکہ موقع سے کثیر مقدار میں نیم تعمیر اسلحہ اور اسلحہ بنانے کا سامان بھی برآمد کیا گیا ہے ۔

تفتیش کے دوران گرفتار لوگوں نے بتایاکہ سرحدی اتر پردیش کے کشی نگر ضلع کے بیکنٹھ پور تھانہ باشندہ ادریس میاں کے لئے بندوق بنائی جارہی تھی ۔

گرفتار دونوں افراد قبل میںبھی آرمس ایکٹ کے ملزم رہ چکے ہیں اور اس سلسلے میں جیل بھی جاچکے ہیں۔

انہوں نے بتایاکہ گرفتار دونوں ملزمین کو سموار کو عدالتی حراست میں جیل بھیج دیا گیا ہے ۔ تیسرے ملزم ادریس میاں کی گرفتاری کیلئے چھاپے ماری کی جارہی ہے ۔