لالو یادو این ڈی اے کے اراکین اسمبلی کو جیل سے فون کر رہے ہیں: سشیل کمار مودی

بہار کے سابق نائب وزیر اعلی سشیل کمار مودی نے ایک ٹویٹ کرتے ہوئے لالو یادو پر الزام عائد کیا ہے کہ لالو یادو جیل سے این ڈی اے کے اراکین کو فون کر رہے ہیں۔

پٹنہ: سابق ڈپٹی سی ایم سشیل کمار مودی نے ایک بڑا بیان دیا ہے۔ انہوں نے ایک ٹویٹ کرتے ہوئے لکھا ہے کہ آر جے ڈی سپریمو لالو یادو رانچی جیل سے این ڈی اے کے ممبران کو فون کر کے انہیں وزیر بنانے کا یقین دہانی کرا رہے ہیں۔ سشیل مودی کے اس ٹویٹ کے بعد بہار کی سیاسی سرگرمیاں بڑھ گئی ہیں۔

سشیل کمار مودی نے ٹویٹ کرتے ہوئے لکھا کہ 'لالو یادو رانچی سے این ڈی اے کے ممبران کو فون کر رہے ہیں۔ وہ انہیں وزیر بنانے کا وعدہ کر رہے ہیں۔'

انہوں نے لکھا ہے کہ میں نے موصولہ نمبر پر فون کیا تو لالو یادو نے فون اٹھایا۔ میں نے ان سے کہا کہ جیل سے یہ گندی حرکتیں مت کرو۔ آپ اس میں کامیاب نہیں ہوں گے۔ سشیل مودی نے بھی ٹویٹ کر کے ایک نمبر جاری کیا ہے۔

تاہم ای ٹی وی بھارت نے جب اس نمبر پر رابطہ کیا تو جاری نمبر انویلڈ بتایا۔ وہیں اس نمبر کا لوکیشن بنگلور کا دکھا رہا ہے۔ ایسے میں سشیل مودی کا الزام رانچی کے ہوٹوار جیل انتظامیہ پر بھی سوال کھڑا کرتا ہے ۔

واضح رہے کہ بدھ کے روز بہار اسمبلی اسپیکر کے انتخاب کے لئے این ڈی اے اور مہاگٹھ بندھن کی جانب سے امیدوار اتارے گئے ہیں۔

اس دوران عظیم اتحاد کی جانب سے تیجوی نے بھی اپنے ارکان اسمبلی سے ایک میٹنگ کی۔ وہیں این ڈی اے نے اپنے اراکین اسمبلی کے لئے ایک وہپ بھی جاری کیا ہے