'لالو یادو کی رہائی سے بہار کے عوام کو مضبوطی ملے گی'

آر جے ڈی کے سپریمو لالو یادو کو ضمانت ملنے کی خبر سے پارٹی کے تمام رہنماؤں سمیت غرییوں میں بھی خوشی دیکھی جارہی ہے۔

آر جے ڈی کے سینئر رہنما و راجیہ سبھا کے رکن پارلیمان اشفاق کریم نے لالو پرساد یادو کی رہائی کو غریبوں اور مظلوموں کی فتح قرار دیتے ہوئے کہا کہ اب ریاست میں انصاف کی آواز سنائی دے گی۔

اشفاق کریم نے کہا کہ تاخیر سے ہی سہی لیکن غریبوں کے مسیحا بے زبانوں کی زبان لالو پرساد یادو کو ہائی کورٹ سے انصاف مل گیا۔ ان کے رہا ہونے سے بہار کے عوام کو مضبوطی ملے گی۔

انہوں نے کہا کہ لالو یادو کورونا کے اس دور میں غریبوں اور متاثرین اور مصیبت زدہ لوگوں کی رہنمائی کریں گے۔

واضح رہے کہ لالو پرساد یادو چارہ گھوٹالہ معاملے میں سزا کاٹ رہے تھے اور جھارکھنڈ میں قید تھے، لالو یادو کو چائی باسا کے دو معاملے اور دیو گھر کے ایک معاملے میں پہلے ہی ضمانت مل چکی ہے جبکہ دمکا کیس میں کل ہائی کورٹ سے ضمانت ملنے کے بعد لالو یادو کا جیل سے باہر آنے کا راستہ صاف ہوگیا ہے۔