ہردن کسی نہ کسی شہر میں میونسپل کارپوریشن کا صفائی عملہ آپ کو صفائی کرتا ہوا نظر آجائے گا،لیکن ریاست بہار کے شہر گیا کے میونسپل کارپوریشن کے صفائی اہلکار، کچڑا اٹھانے والی گاڑیوں کے ڈرائیوروں نے انہی کچرے اور کچروں میں شامل گھروں کے فضول اور ناقابل استعمال سامانوں سے پارک بنایا ہے،گیا میں ایک ایسا پارک ہے کہ جسے دیکھ کر آپ کہیں گے ' واہ کیا بات ہے ' اور آپکو صفائی عملہ پر فخر ہوگا ۔ A park made of garbage and unusable materials
دراصل گیا کے اسٹیشن روڈ پر واقع میونسپل کارپوریشن کا اسٹور ہے جس میں کباڑ اور شہر سے نکلنے والے کوڑے سے پارک بنایا گیا ہے، پارک بنانے کا کام سنہ 2019 سے شروع ہوا اور آہستہ آہستہ یہ پوری طرح سے بن کر مکمل ہوچکا ہے ، کارپوریشن کا اسٹور کیمپس قریب ایک بیگہ اراضی پر ہے اس میں ایک حصہ کباڑ سے بھرے ہونے کے ساتھ قریب تین کھٹھہ کی جگہ خالی تھی یہاں پر کچرے پھینکنے کے علاوہ صفائی عملہ صبح وشام حاجت سے فارغ ہوتا تھا ، چونکہ اس جگہ پر پہلے ٹوائلٹ کی کمی تھی تو یہاں کے اسٹاف کھلے میں ہی حاجت سے فارغ ہوتے تھے اس اسٹور میں گندگی، بدبو اور اسکی وجہ سے مچھر مکھیاں کیڑے مکوڑے اس قدر تھے کہ کارپوریشن کا عملہ بھی بغیر کسی کام کے وقت گزارنا پسند نہیں کرتا تھا تاہم کارپوریشن کے صفائی عملہ نے دوسروں کے گھروں کی صفائی کے ساتھ اپنی جگہ اور دفتر کی صفائی ستھرائی کا ذمہ اٹھایا اور اس کو پارک کی شکل دینے کی کوشش ہونے لگی ۔
شہر کے کچروں سے خراب سامانوں کو نکال کر کچرا پارک میں خوبصورت انداز میں سجایا گیا ہے۔ سجاوٹ ایسی کہ دیکھنے والا بھی سوچنے پر مجبور ہے کہ کیا خراب ہونے کے بعد کوڑے میں پھینکی جانے والی چیزوں کو اتنی بڑی شکل دی جا سکتی ہے؟ میونسپل کارپوریشن کے ایک ملازم راجیش کمار نے کہاکہ کچرے کو صحیح ٹھکانے لگانے کے لیے خاص اقدامات کیے ہیں۔ ماحولیات کو آلودگی سے بچانے اور یہاں خوبصورتی اور پرسکون ماحول رکھنے کے لیے ہم لوگوں نے پارک بنایا ہے ، چھوٹے وبڑے کچرے کو ری سائیکل کیا گیا ہے۔ اس کے بعد انہیں خوبصورت شکل دی گئی ہے،انہوں نے کہاکہ شہر میں باقاعدہ کچرا اٹھانے کا کام ہو رہا ہے۔ شہر سے نکلنے والے کچرے سے کھاد بھی بنائی جارہی ہے۔ یہی وجہ ہے کہ اس سال گیا شہر پورے بہار میں صفائی سروے میں سرفہرست رہا۔ Kachra Park in Gaya