جے ڈی یو پر پیسہ لے کر ٹکٹ دینے کا الزام

ریاست بہار کے ضلع سیتامڑھی کے جے ڈی یو کے کارکن سریش پرساد یادو نے جے ڈی یو پر الزام لگایا کہ سیتامڑھی میں ڈاکٹر ورون کمار کو پارٹی کے ریاستی صدر اور ایک ایم پی نے موٹی رقم لے کر ٹکٹ دیا ہے۔

این ڈی اے کے ذریعہ آج امیدواروں کے اعلان کے بعد بی جے پی کے ریاستی دفتر پٹنہ میں سیتامڑھی سے آئے سریش پرساد یادو نے پریس کانفرنس کے بعد ہنگامہ شروع کردیا وہ چیخ چیخ کر کہہ رہے تھے کہ پارٹی کے سینئر رہنماؤں نے حلقۂ پارلیمان سیتامڑھی سے ڈاکٹر ورون کمار کو 20 کروڑ روپے لے کر ٹکٹ دیا گیا ہے اور سیتامڑھی میں اس تعلق سے 50 کروڑ روپے کی بات گشت کر رہی ہے۔

ان کا کہنا ہے کہ وہ سیتامڑھی سے ایک مضبوط امیدوار تھے لیکن غریب ہونے کی وجہ سے انہیں نظرانداز کردیا گیا اور پارٹی نے پیسہ لے کر ایک ایسے آدمی کو ٹکٹ دیا ہے جس کے خلاف سی بی آئی کا مقدمہ چل رہا ہے اور سی بی آئی نے کئی بار چھاپے ماری کی ہے۔

سریش پرساد یادو نے مزید کہا کہ وہ 1974 سے سیاست میں ہیں اور جے ڈی یو کے وہ سب سے پرانے کارکنان میں سے ہیں۔