گیا: انٹر فرسٹ ڈویژن سے پاس ہونے والی طالبات کے لیے ترغیبی رقم

انٹرمیڈیٹ میں فرسٹ ڈویژن سے پاس ہونے والی 1196 طالبات کو حوصلہ افزائی کے لئے رقم دی جائے گی، اس کے لیے محکمہ اقلیتی بہبود نے طالبات سے کاغذات اور بینک کی تفصیلات مانگی ہے۔

بہار کے ضلع گیا میں وزیر اعلیٰ اقلیتی اسٹوڈنٹس حوصلہ افزائی اسکیم کے تحت 1196 طالبات مستفید ہوں گے، اس اسکیمز کے تحت انٹر کے امتحان میں فرسٹ ڈویژن سے کامیاب ہونے والی طالبات کو پندرہ ہزار روپے دیے جاتے ہیں۔ جبکہ رواں سال 2021 میں 1196 طالبات فرسٹ ڈویژن سے کامیاب ہوئی تھیں، ان سبھی طالبات کو محکمہ اقلیتی بہبود نے ضلع ایجوکیشن دفتر میں طلب کیا ہے۔

ضلع اقلیتی بہبود کی جانب سے ضلع ایجوکیشن افسر کو لیٹر جاری کرکے کہا گیا ہے کہ ضلع کے سبھی اسکولز وکالج جہاں سے انٹر کے امتحان میں طالبات کامیاب ہوئی ہیں۔ ان سبھی اسکولوں سے تفصیلات حاصل کرکے ضلع اقلیتی بہبود کے دفتر کو دستیاب کرایا جائے تاکہ سبھی کے بینک کھاتے میں حوصلہ افزائی کی رقم بھیجی جاسکے۔

اس سلسلے میں ضلع اقلیتی فلاح کے افسر جتیندر کمار نے بتایا کہ آئندہ ایک ہفتے کے اندر فرسٹ ڈویژن سے کامیاب ہونے والی طالبات کی اسکول کے توسط سے بینک کھاتے کی تفصیل، انٹر کی مارک شیٹ، ایڈمٹ کارڈ، آدھار کارڈ، رہائشی سرٹیفکیٹ مانگی گئی ہے، طالبات اپنے اپنے اسکولوں میں یہ تمام کاغذات جمع کرائیں تاکہ رقم ان کے کھاتے میں بھیجی جاسکے۔

واضح رہے کہ گزشتہ برس کل 1501 طالبات انٹر کے امتحان میں فرسٹ ڈویژن سے کامیاب ہوئی تھیں جن میں 1356 طالبات نے اسکیم استفادہ کیا بقیہ طالبات نے اپنے کاغذات دستیاب نہیں کرائے تھے، اس اسکیم میں خاص بات یہ ہے کہ اس کی رقم متعین وقت تک جاری کی جاتی ہے، وقت ختم ہونے پر اس اسکیم کا فائدہ نہیں دیا جاتا ہے۔