گیا میں اے ٹی ایم سے تیرہ لاکھ 62 ہزار روپے کی لوٹ کا معاملہ پولیس نے حل کرلیا ہے۔ رام پور انسپکٹر کے دفتر کے سامنے ایچ ڈی ایف سی بینک کے اے ٹی ایم میں 9 جون کو لوٹ کامعاملہ پیش آیاتھا۔
واردات میں شامل دو بدمعاشوں کو پولیس نے گرفتار بھی کرلیا ہے۔ ان کے پاس سے نقد رقم سمیت پیسے سے خریدی گئی گاڑیوں کو بھی ضبط کیا گیا ہے۔
حالانکہ ابھی اور بدمعاش پولیس کی گرفت سے باہر ہیں جس کی وجہ سے پورا پیسہ وصول نہیں ہوا ہے۔
ایس ایس پی راجیومشرا نے بتایا کہ اے ٹی ایم لوٹ معاملے میں دوافراد کی گرفتاری ہوئی ہے۔ ان کے پاس سے ایک الٹو گاڑی اور ایک ٹیمپو سمیت ستائیس ہزار روپئے نقد برآمد ہوئے ہیں۔گرفتار ہونے والوں میں کونچ تھانہ حدود کا رہنے والا اجیت کمار اور دوسرا کریمن عرف ٹنکو ہے۔
انہوں نے بتایا کہ لوٹ کے بعد لائنر کا کام کرنے والے اجیت کمار کو حصے میں ایک لاکھ روپیہ ملا تھا جس سے اس نے پچاس ہزار میں ایک پرانا ٹیمپو خریدا ہے جبکہ اس کے گھر سے ستائیس ہزار روپے نقد برآمد ہوئے ہیں، بقیہ روپے اسکے ذریعے خرچ کر دیا گیا ہے۔
انہوں نے بتایا کہ کونچ کا رہنے والا کریمن کو حصے میں دو لاکھ روپے ملے ۔جس کے بعد کریمن نے دولاکھ سترہزار میں ایک الٹو گاڑی خریدی۔
انہوں نے کہاکہ بقیہ نو لاکھ روپئے دیگر چار لوگوں کے درمیان تقسیم ہوئے ہیں۔ جھارکھنڈ کے ہزاری باغ سے ضمانت پر چھوٹے بدمعاش بھی اس واردات میں شامل ہیں۔
ایس ایس پی نے بتایا کہ ہزاری باغ کے بدمعاشوں نے اس سے قبل بودھ گیا کے اے ٹی ایم سے بھی 26 لاکھ روپئے لوٹے تھے۔ ان کی گرفتاری کے لئے چھاپے ماری کی جارہی ہے۔
