شہر گیا میں گزشتہ روز چار برس کی بچی کے ساتھ جنسی زیادتی کرنے کے بعد اسے قتل کرنے اور لاش ریلوے ٹریک پر پھینکنے کا معاملہ سامنے آیا تھا جس کے بعد پولیس نے ایک شخص کو گرفتار کیا۔
اس معاملے میں گیا پولیس نے صدام نام کے شخص کو گرفتار کر کے جیل بھیج دیا ہے۔ گرفتار شخص پیشہ وارانہ مجرم ہے اور اس سے قبل بھی جیل جا چکا ہے۔
مقامی لوگوں نے ملزم کو بچی کی لاش ریلوے ٹریک پر پھینکتے ہوئے رنگے ہاتھ پکڑ کر اسے پولیس کے حوالے کر دیا تھا۔
واردات کے بعد مقامی لوگوں پولیس کی کاروائی سے ناراض ہو کر سڑک جام کرکے احتجاج کیا تھا۔ اس واردات کو ایس ایس پی آدتیہ کمار نے سنجیدگی سے لیتے ہوئے فوری طور پر جانچ شروع کرتے ہوئے ملزم کا مجرمانہ ریکارڈ نکلوایا اور اب اسے سلاخوں کے پیچھے ڈال دیا گیا ہے۔
اس سلسلے میں ایس ایس پی آدتیہ کمار نے ای ٹی وی بھارت کو بتایا کہ تحقیقات مکمل ہوچکی ہے۔ ملزم کے خلاف پختہ ثبوت ہیں اور کیس کی سماعت میں تاخیر نہیں ہو اس لیے پولیس محکمہ تفتیش کے اپنے سبھی کام مکمل کرنے مصروف ہے۔
انہوں نے کہا بچی کے والدین چوڑی فیکٹری میں کام کرتے ہیں اور بچی اپنے ننیہال میں رہتی تھی جبکہ ملزم اس کا رشتہ دار ہے اور گھر کے قریب ہی رہتا تھا اس لیے اس نے موقع پا کر ایسی حرکت کی۔