محکمہ جنگلات نے آٹھ آرا مشینیں ضبط کی

ریاست بہار کے ضلع گیا میں واقع ڈومریا بلاک میں چلنے والی غیرقانونی آرا مشینوں کو محکمہ جنگلات اور ضلع انتظامیہ کی جانب سے ضبط کیا گیا ہے۔

گیا ضلع فاریسٹ افسر ابھشیک سنگھ، رینجر ستیندر سنگھ اور سرکل افسر اروندچودھری کی قیادت میں جمعہ کو آٹھ غیرقانونی طریقے سے چلنے والی مشینوں کو ضبط کیا گیا ہے، اور جے سی بی چلاکر جگہ کو تباہ کیا گیا ہے۔

خیال رہے کہ سرکل افسراروند چودھری نے بتایا کہ ضلع مجسٹریٹ کواطلاع موصول ہوئی تھی کہ ڈومریا میں غیرقانونی ڈھنگ سے درجنوں آرامشینیں چل رہی ہیں۔ جس کے بعد ڈی ایم ابھشیک کمار کی ہدایت پر کولسوتا سے چار، بلیا سے تین اور سوجی گاؤں سے ایک آرا مشین کو ضبط کیاگیا ہے۔

امام گنج کے رینجر امیش کمار نے بتایا کہ ضبط کی گئی لکڑیوں میں شیشم، چیریتا، ببول اور آم کی لکڑی ہے۔ اس کے علاوہ پانچ ڈیزل انجن، چارعدد لکڑی کاٹنے والی مشین کو ضبط کیا گیا ہے۔

انہوں نے بتایا کہ یہ کاروائی تسلسل کے ساتھ الگ الگ علاقوں میں جاری رہیگی۔

دوسری جانب آرا مشینوں پر چھاپے ماری کی خبر ملتے ہی مالکان اور آپریٹرز فرار ہوگئے، جبکہ لکڑی مافیاؤں میں خوف کاماحول ہے۔