شہریت ترمیمی قانون کی مخالفت و حمایت عروج پر

بہار کے شہر گیا میں منگل کو شہریت ترمیمی قانون کی حمایت اور احتجاج دونوں ہی طرح کے نعرے گونجے۔ یوپی کے وزیراعلی یوگی آدتیہ ناتھ اور بہار کے نائب وزیراعلی سشیل مودی نے سی اے اے کو تین ملکوں کے اقلیتوں کے حق میں بتایا تو بہار کے حزب اختلاف کے رہنما تیجسوی یادونے سی اے اے کو ملک اور آئین مخالف قرار دیا۔

ریاست بہار کے شہر گیا میں سی اے اے ایکٹ کی حمایت میں یوپی کے سی ایم یوگی آدتیہ ناتھ نے گاندھی میدان میں بی جے پی کے عوامی بیداری کے ایک جلسے سے خطاب کیا جبکہ حزب اختلاف کے رہنما تیجسوی یادو نے سی اے اے واین آرسی کے خلاف گزشتہ سترہ دنوں سے جاری احتجاجی دھرنا میں پہنچ کر خطاب کیا۔

یوگی آدتیہ ناتھ نے سی اے اے پر گفتگو کرتے ہوئے اس کو حکومت ہند کا ایک اہم قدم قرار دینے کی کوشش کی وہیں تیجسوی یادونے اس ایکٹ کی خامیوں اور اس کے نقصانات کوگنوایا۔

بہار اسمبلی میں حزب اختلاف کی جماعت کے رہنما تیجسوی یادو نے سی اے اے قانون کے خلاف احتجاج میں شانتی باغ میں منعقدہ غیر معینہ مدت کے دھرنے میں شامل ہو کر اس قانون کو ملک مخالف ہونے کے بارے میں اپنے دلائل پیش کئے۔

منگل کو دونوں رہنماوں کی آواز گیا میں گونجی اور اس کے بعد دونوں طرف کے کارکنان نے اپنے اپنے پروگرام کو کامیاب ہونے کی دلیلیں پیش کرتے نظر آئے۔

یوگی ادتیہ ناتھ نے دن کے ایک بجے گاندھی میدان میں خطاب کیا جبکہ تیجسوی یادو نے شام سات بجے خطاب کیا۔ دونوں کے جلسہ گاہ محض کچھ ہی فاصلے پر واقع تھے۔

یوگی اور تیجسوی کے خطاب سے کتنے لوگ متاثر ہوئے ہیں یہ تو کہنا مشکل ہے تاہم آرجے ڈی اور بی جے پی کے کارکنان و رہنما اپنے اپنے رہنماء کے بیان کو درست ٹھہراتے ضرور نظر آئے۔

بی جے پی کے رہنماوں کا دعوی تھا کہ 'یوگی کے جلسہ میں زیادہ بھیڑ تھی۔'

جبکہ آرجے ڈی کے رہنماوں کے ذریعے دعوی کیا گیا کہ 'یوگی کے جلسہ عام سے زیادہ غیر معینہ دھرنے میں بھیڑ تھی یہاں ہزاروں خواتین بھی موجود تھیں جبکہ یوگی ادتیہ ناتھ کے جلسہ میں سو ڈیڑھ سو ہی خواتین تھیں۔

یوگی کے جلسہ میں زیادہ تر پارٹی کے کارکنان ولیڈران کے ہونے کا دعوی پیش کیا گیا جبکہ دھرنے میں عام لوگوں کے ہونا بتایا گیا ہے۔