موتیہاری: مہنگائی کے خلاف کانگریس کارکنان کا احتجاج

مہنگائی کے خلاف بہار کے مشرقی چمپارن موتیہاری میں کانگریس کارکنان نے احتجاج کیا۔ اس موقع پر شیلندر شکلا نے کہا کہ مرکزی سرکار گیس کی قیمت واپس لے ورنہ عوام اقتدار سے بے دخل کردے گی۔

ملک میں بڑھ رہی مہنگائی کے خلاف کانگریس کارکنان ان دنوں سراپا احتجاج ہیں۔ اس سمت میں مشرقی چمپارن کے موتیہاری میں کانگریس کارکنان نے سائیکل ریلی نکال کر مہنگائی کے خلاف ناراضگی کا اظہار کیا۔

ریلی ضلع کانگریس صدر شیلندر کمار شکلا کی قیادت میں نکالی گئی۔ اس موقع پر انہوں نے کہا کہ مہنگائی آسمان چھورہی ہے اور مرکزی سرکار نیند میں سوئی ہوئی ہیں۔ ڈیزل اور پٹرول کی قیمت کانگریس کے دور حکومت میں کم تھی لیکن اس سرکار کے مرکز میں آنے کے بعد سے ہر روز اس میں اضافہ ہورہا ہے۔ نوجوان روزگار کے لئے پریشان ہے۔

انہوں نے مزید کہا کہ مرکزی سرکار گیس کی قیمت کو واپس لے اور ڈیزل وپٹرول میں روز ہورہے اضافے پر کنٹرول کرے۔ ورنہ یہ عوام اقتدار سے بے دخل کردے گی۔ اس موقع پر پروفیسر وجے شنکر پانڈے، سابق امیدوار رام بابو یادو، مُن مُن جیسوال، نعیم خان، محمد امتیاز اور شیام لال مانجھی سمیت دیگر کانگریس کارکنان موجود تھے۔