پٹںہ میں مہنگائی کے خلاف کانگریس کا احتجاج

مہنگائی کے خلاف بہار کے دارالحکومت پٹنہ میں کانگریس کارکنان نے سائیکل ریلی نکال کر مرکزی حکومت کے خلاف احتجاج کیا اور مہنگائی کو جلد کم کرنے کی مانگ کی۔

ملک میں بڑھتی ہوئی مہنگائی کے خلاف پٹنہ میں کانگریس کارکنان نے جم کر مظاہرہ کیا۔ سب سے پہلے پٹنہ کے بورنگ روڈ سے جے پی گولمبر تک سائیکل ریلی نکالی گئی اور اس کے بعد گاندھی میدان میں گاندھی جی کے مجسمے کے پاس دھرنا دیا۔ جہاں مرکزی حکومت کے خلاف نعرے بازی کی گئی۔ اس میں خواتین نے بڑھ چڑھ کر حصہ لیا۔

مظاہرین میں کانگریس بہار کے انچارج بھکت چرن داس موجود تھے۔ انہوں نے اپنے خطاب میں کہا کہ مرکزی حکومت سے حکومت نہیں چل پارہی ہے تو اقتدار سے بے دخل ہو جانا چاہیے۔ مہنگائی سے لوگ پریشان ہے، کانگریس مہنگائی کے خلاف اس وقت تک تحریک جاری رکھے گی جب تک کہ مہنگائی کو کم نہیں کیا جاتا ہے۔

اس موقع پر بہار پردیش کانگریس کے صدر مدن موہن جھا نے کہا کہ "ہم چاہتے ہیں کہ حکومت جلد سے جلد مہنگائی سے لوگوں کو راحت دے۔ جس طرح سے ہر روز مہنگائی میں اضافہ ہو رہا ہے۔ اس سے عام لوگ پریشان ہیں، جب تک حکومت مہنگائی پر کچھ نہیں کرتی ہیں اس وقت تک تحریک جاری رہے گی"۔

وہیں پٹرول، ڈیزل اور مہنگائی کو لے کر راشٹریہ جنتادل بھی اتوار یعنی کل سے احتجاج کرنے جارہی ہے۔ آر جے ڈی کارکنان ضلع کے سبھی بلاکوں میں مرکزی سرکار کے خلاف احتجاج کریں گے۔