پورنیہ کی عدالت میں راہل گاندھی کے خلاف مقدمہ

بہار میں پورنیہ کے چیف جوڈیشیل مجسٹریٹ کی عدالت میں کانگریس کے صدر راہل گاندھی کے خلاف مودی کمیونٹی کے تعلق سے قابل اعتراض تبصرہ کرنے کے ایک معاملے میں مقدمہ دائر کیا گیا ہے۔

چیف جوڈیشیل مجسٹریٹ کے سامنے پورنیہ ضلع کے قصبہ تھانہ علاقہ کے مودی ٹولہ کے رہنے والے درخواست گذار منوج مودی نے اپنے وکیل دلیپ کمار کے توسط سے یہ عرضی دائر کی ہے۔

درخواست میں کہا گیا ہے کہ کرناٹک کے بنگلور میں ایک عوامی جلسہ کے دوران کانگریسی صدر کے سارے مودی کو چور کہنے سے مودی لقب رکھنے والے اس کمیونٹی کے لوگ رنجیدہ ہیں۔ درخواست گذار نے یہ بھی کہا ہے کہ اب تو ان کے دوست بھی 'چور' کہہ کر ان کا مذاق اڑانے لگے ہیں۔

راہل گاندھی نے پورے مودی سماج کے جذبات کے ساتھ کھلواڑ کیا ہے اور غلط بیان دے کر سماج میں مودی کمیونٹی کے تئیں غلط تاثر پیدا کرنے کی کوشش کی ہے ۔

وکیل نے بتایا کہ شکایت میں کرناٹک کے بنگلور میں دی گئی تقریر کا حوالہ دیا گیا ہے جس میں راہل گاندھی کے ذریعہ کہا گیا تھا کہ چاہے وہ نیرو مودی ہو، چاہے للت مودی یا نریندر مودی۔ سارے مودی چور ہیں۔

اس بیان کے بعد مودی کمیونٹی میں یہ پیغام گیا کہ راہل گاندھی نے انہیں بے عزت کیا ہے۔ اس سے وہ غمزدہ ہو کر جوڈیشیل مجسٹریٹ کی عدالت میں ان کے موکل نے معاملہ درج کرایا ہے۔ اس میں راہل گاندھی کے خلاف بھارتی آئین کی دفعہ 499 اور 500 کے تحت معاملہ درج کیا ہے۔