گیا: پنچایت انتخابات کی ووٹنگ میں مسلم خواتین پیش پیش

گیا میں پنچایت انتخابات کے تحت ووٹنگ کا عمل جاری ہے جبکہ مردوں کی بنسبت خواتین میں زیادہ جوش و خروش دیکھا جارہا ہے۔ بیلاگنج میں 33 فیصد اور خضر سرائے میں 57 فیصد خواتین نے حق رائے دہی کا استعمال کیا۔

ضلع گیا کے بیلاگنج اور خضر سرائے میں پنچایتی انتخابات کے پہلے مرحلے کے تحت ووٹنگ کا عمل معمولی جھڑپوں اور ای وی ایم مشینوں کی تکنیکی خرابیوں کے درمیان جاری رہا۔ دوپہر ایک بجے تک بیلاگنج میں 44 فیصد افراد نے حق رائے دہی کا استعمال کیا۔ جبکہ خضر سرائے بلاک میں 47 فیصد لوگوں نے ووٹنگ کی، جن بوتھس پر ووٹنگ فیصد کم ہے وہاں ای وی ایم مشین میں گڑبڑی اور بہتر نظم ونسق نہیں ہونے کی وجہ شرح ووٹنگ کم درج کی گئی۔

تاہم اس درمیان خوش آئند ہے کہ دونوں بلاکس میں مردوں کی بنسبت خواتین کی ووٹنگ فیصد زیادہ درج کی گئی جسکی وجہ سے علاقے کے ووٹرز کی توقع ہے کہ اس مرتبہ گاؤں دیہات کی نمائندگی میں تبدیلی آنے کی امید ہے۔ ووٹنگ فیصد بڑھنے کی وجہ سے ای وی ایم مشین کا استعمال ہونا ہے۔

اس مرتبہ خاص بات یہ ہے کہ مسلم خواتین بھی بڑھ چڑھ کر حصہ لے رہی ہیں، بیلاگنج کے سبھی بوتھس پر مسلم خواتین کی قطار نظر آئی کیونکہ بیلاگنج بلاک میں مسلمانوں کی آبادی تیس فیصد سے زیادہ ہے۔

اس سلسلے میں بی ڈی او کندن کمار نے بتایا کہ ان کے بلاک علاقے میں پرامن ماحول میں ووٹنگ ہورہی ہے۔ ابھی تک ووٹنگ فیصد بھی اچھی ہے۔ اس مرتبہ حکومت نے ای وی ایم مشین کے ساتھ بایو میٹرک کا بھی استعمال ووٹنگ کے دوران کرانے کی پہل کی تھی تاہم نوے فیصد بوتھس پر بایو میٹرک خراب ہے۔