موٹر سائیکل اور نقدی کے ساتھ ملزمین گرفتار

ریاست بہار کے ضلع ارریہ کے پلاسی بلاک میں دو روز قبل بندھن بینک ملازم سے 94 ہزار کی لوٹ کے معاملے میں پولیس نے فوری طور پر کارروائی کرتے ہوئے دو جرائم پیشہ افراد کو گرفتار کر کے جیل بھیج دیا ہے۔

ایس پی دھورت سائلی نے بتایا کہ 'دو روز قبل ہوئے لوٹ کے واقعے میں دو لوگوں کو گرفتار کیا گیا اور لوٹ میں استعمال کی گئی موٹر سائیکل کے ساتھ 94 ہزار روپے میں سے 7 ہزار روپے نقد ضبط کیے گئے۔'

ایس پی نے کہا کہ 'ارریہ پولیس اس واقعے کے ملزمین کی تلاش میں مصروف تھی اور آج اس معاملے میں ملوث ملزمین کو گرفتار کر لیا گیا۔'

ایس پی نے کہا کہ 'پولیس اپنا کام پوری ایمانداری سے کر رہی ہے، اس طرح کے واقعات انجام دینے والوں کو کسی بھی حال میں بخشا نہیں جائے گا۔'

واضح رہے کہ ضلع ارریہ میں ان دنوں جرائم کی واردات میں اضافہ ہوتا جا رہا ہے۔ جرائم پیشہ افراد بے خوف ہو کر مختلف واردات کو انجام دے رہے ہیں لیکن اب ضلع انتظامیہ نے بھی جرائم پر نکیل کسنے کے لیے کمر کس لی ہے۔