سوپور تصادم : ہلاک شدہ عسکریت پسندوں سے اسلحہ، بارود برآمد

رفیع آباد ریبن میں گذشتہ روز لشکر طیبہ کے تین عسکریت پسندوں کو سیکیورٹی فورسز نے ہلاک کر دیا تھا، جس کے بعد آج انہیں بارہمولہ میں دفن کیا گیا۔

شمالی کشمیر کے ضلع بارہمولہ کے رفیع آباد کے ریبن نامی گاؤں میں گذشتہ روز سیکیورٹی فورسز نے تین عسکریت پسندوں کو ہلاک کیا تھا۔

اسی سلسلے میں آج تحصیل سوپور میں ڈی آئی جی شمالی کشمیر محمد سلیمان چودھری، 5 سیکٹر آرآر کے کمانڈر وویک نارنگ اور ایس ایس پی سوپور جاوید اقبال کی زیر صدارت ایک پریس کانفرنس کا انعقاد کیا گیا۔

اس موقع پر محمد سلیمان چودھری نے کہا کہ 'تینوں عسکریت پسند بڑی کارروائی انجام دینے جا رہے تھے۔ تاہم گذشتہ رات تینوں عسکریت پسندوں کو ہلاک کیا گیا۔

انہوں نے کہا 'عسکریت پسندوں سے تین اے کے 47 رائفل ,نو مگیزین, تین پاوچ, ایک سو چالیس گولیاں, ایک بوٹ اور گھڑی برآمد کی گئی ہے'۔

انہوں نے مزید کہا 'یہ تینوں عسکریت پسند بائی پاس کے شوٹ آوٹ میں ملوث تھے اور فوج اور پولیس نے مشترکہ طور پر سرچ آپریشن کے دوران انہیں ہلاک کیا۔

واضح رہے کہ تینوں عسکریت پسندوں کا کوئی وارث نہ ہونے کی وجہ سے انہیں سوپور کے شیری علاقے میں دفن کیا گیا ہے۔

پولیس کے مطابق تینوں میں سے دو کی شناخت ہوئی ہے جبکہ ایک کی شناخت ابھی نہیں ہو پائی ہے۔