عسکری پناہ گاہ تباہ

ضلع بارہمولہ کی پولیس نے سوپور میں عسکریت پسندوں کے ایک ٹھکانے کو تباہ کرنے کا دعوی کیا ہے۔ پولیس کے مطابق یہاں سے گولہ بارود برآمد کیا گیا ہے۔

شمالی کشمیر کے ضلع بارہمولہ کے تحصیل ہیڈکوارٹر سوپور سے چار کلو میٹر دور دوآبگاہ نامی گاؤں میں پولیس 'سی آر پی ایف' اور فوج کی ایک مشترکہ کاروائی کے دوران عسکریت پسندوں کے ایک ٹھکانے کو تباہ کر کے گولہ بارود برآمد کیا گیا ہے۔

اس سلسلے میں پولیس نے ایک بیان جاری کرتے ہوئے کہا کہ ایک مصدقہ اطلاع ملنے پر جائے مقام سے عسکریت پسند گروپ کی پناہ گاہ کو تباہ کیا ہے اور وہاں سے سولہ گرینیڈ، گولیاں اور باقی کچھ ضروری چیزیں برآمد کر کے عسکریت پسند سے وابستہ ایک کارکن کو گرفتار کیا گیا ہے۔ اس حوالے سے سوپور پولیس نے ایک کیس درج کیا ہے۔ معاملے کی تفتیش شروع کی گئی ہے۔